მაღაზიათა ქსელი ბიბლუსი აცხადებს, რომ მაცივარზე მისაკრავი საქართველოს რუკის სუვენირი, რომელსაც ოკუპირებული აფხაზეთის ტერიტორია აკლია, მომწოდებელმა შეაპარა. მაღაზიის განმარტებითი, ხარვეზიანი სუვენირის რაოდენობა მხოლოდ რამდენიმეა და ის ერთადერთ ფილიალში აღმოაჩინეს.

გთავაზობთ ბიბლუსის განცხადებას სრულად:

"რამდენიმე წუთის წინ სოციალურ ქსელში გავრცელდა ინფორმაცია, რომ ბიბლუსის მაღაზიათა ქსელში იყიდება სუვენირი - საქართველოს რუკა, რომელზეც აფხაზეთი არ არის დატანილი.

გვინდა იცოდეთ, რომ ბიბლუსს მსგავსი სუვენირი არ შეუძენია, ჩვენ ქსელში შემოვიტანეთ რა თქმა უნდა, ისეთი, რომელზეც ჩვენი სამშობლო სრულად არის დატანილი. თუმცა, როგორც გაირკვა, მომწოდებელმა, რომელმაც აღნიშნული პროდუქცია მოგვაწოდა, შემოგვაპარა რამდენიმე ცალი ხარვეზიანი. აღნიშნული ინფორმაცია გადავამოწმეთ სრულად ქსელში და წუნდებული სუვენირი რამდენიმე ცალი მხოლოდ ერთ კონკრეტულ ფილიალში დაფიქსირდა.

აღნიშნულ საკითხთან დაკავშირებით ჩვენი იურისტები ხვალვე მიმართავენ სამართალდამცავ ორგანოებს, რათა გამოიძიონ ეს ფაქტი.

საქართველო ჩვენთვის იყო, არის და იქნება ყოველთვის აფხაზეთით და რა თქმა უნდა, არასოდეს შევეგუებით ჩვენს სამშობლოს ამ უნიკალური ტერიტორიის გარეშე".

სუვენირის შესახებ, რომელიც ბიბლუსში იყიდება, ინფორმაცია, ფოტოებთან ერთად, მოქალაქე ნინო მჭედლიშვილმა ფეისბუკის პირად გვერდზე 11 სექტემბერს გამოაქვეყნა.