დამალობანას ჩემპიონატმა იტალიის მიტოვებულ ქალაქს სიცოცხლე დაუბრუნა

მსოფლიოს ერთ-ერთი ყველაზე საინტერესო სპორტული ღონისძიება, რომლის შესახებ ალბათ არც კი გსმენიათ, ამ შაბათ-კვირას იტალიაში ჩატარდა.

საერთაშორისო დამალობანას ჩემპიონატი ჩრდილოეთ იტალიის მიტოვებულ ქალაქში, კონსონოში გაიმართა.

კონსონოს 1970-იან წლებში იტალიის ლას-ვეგასად მოიაზრებდნენ. მილანში და მიმდებარე ქალაქში მცხოვრებნი იქ გასართობად მიდიოდნენ. ქალაქს საოცარი არქიტექტურა და დიზაინი ამშვენებდა.

იქ იყო ღამის კლუბები, კაზინოები, სათამაშო მოედნები დიდებისთვის, მატარებლით სამოგზაურო ხაზი, ჩინური პაგოდა, შუა საუკუნეების სასახლე. იგეგმებოდა ზოოპარკის მოწყობა და მოტორბოლების გამართვა.

თუმცა მხიარულებამ მხოლოდ რვა წელს გასტანა. 1976 წელს მეწყერმა კონსონომდე მისასვლელი გზა ჩაკეტა და ქალაქის დიდი ნაწილი დაანგრია. ის არასდროს შეკეთებულა, რის შემდეგაც ოდესღაც გართობის ცენტრი მოჩვენებების ქალაქად იქცა.

თუმცა, 2017 წელს, კონსონომ რამდენიმე დღით თავისი სიცოცხლე დაიბრუნა. მსოფლიოს ერთადერთი საერთაშორისო დამალობანას ჩემპიონატმა სტარტი 8 სექტემბერს აიღო და 10 სექტემბრამდე გრძელდებოდა.

სამდღიანმა მარათონმა უძველეს ნიშანს, კონსონოში მუდამ გართობაა, მნიშვნელობა დაუბრუნა.

თამაშის წესები ასეთია: 65 ათასი კვადრატული მეტრის ფართობის ღია მოედანი ხუთ ნაწილად იყოფა. ჯგუფის წევრი თამაშის განმავლობაში ხუთივე ადგილას უნდა იმალებოდეს. ის, ვინც იხუჭებოდა, დამალული მოთამაშე უნდა იპოვოს, ხოლო დამალულმა 1 წუთში უნდა გაიაროს ბარიერები და თამაშის დაწყების ადგილზე პირველი უნდა მივიდეს.

ამასთან ერთად, მონაწილეს ქალაქის შენობაში დამალვის უფლება არ აქვს.

"გვსურდა კონსონოში ღიმილი დაგვებრუნებინა" - ამბობენ ოლიმპიადის ორგანიზატორები.