17 მარტს, დარგობრივი ეკონომიკის სხდომაზე, მედიის კანონის მეორე მოსმენით განხილვაზე, ქართული ოცნების პარლამენტის იურიდიულ საკითხთა კომიტეტის თავმჯდომარემ, არჩილ გორდულაძემ განაცხადა, რომ აღნიშნულ კანონპროექტს დაემატება ჩანაწერი ონლაინმედიებისა და ინტერნეტის რეგულირების შესახებაც.

გორდულაძის განმარტებით, ქცევის სტანდარტი ონლაინმედიებს და "სოციალურ ქსელში, ინფორმაციის განთავსებაზეც" უნდა გავრცელდეს. კანონპროექტის მიხედვით, ინტერნეტ-მედია მომსახურების მიმწოდებლად ჩაითვლება მაუწყებელი ან სხვა პირი, რომელიც მასობრივი ინფორმაციის სახელმწიფო ენაზე ინტერნეტ-დომენის და ინტერნეტ-ჰოსტინგს იყენებს ინფორმაციის გასავრცელებლად.

"როგორც პირველი მოსმენით ჩვენს გუნდთან შეთანხმებით გაჟღერებული იქნა, რომ ე.წ. ონლაინმედიებზეც უნდა გავრცელდეს ქცევის ის სტანდარტი, რაც ზოგადად მაუწყებლებისთვისაა გათვალისწინებული, გამომდინარე იქიდან, რომ იხვეწება და ვითარდება ტექნოლოგიები და ინფორმაციის გავრცელების სხვადასხვა საშუალებებით ხდება ინფორმაციის გავრცელება, ამ ყველაფერზე საკანონმდებლო ცვლილებებიც უნდა არსებობდეს.

წარმოდგენილ კანონპროექტში განიმარტება, თუ რა არის ინტერნეტ მომსახურება და ინტერნეტმომსახურების ცნების განმარტებისას გამოყენებული იქნება დეფინიცია, რომლის მიხედვითაც:

ინტერნეტმომსახურების მიმწოდებლის მიერ მასობრივი ინფორმაციის საქართველოს სახელმწიფო ენაზე ინტერნეტსაშუალების განკუთვნილ ინტერნეტ დომენზე ანდა ინტერნეტ ჰოსტინგის საშუალებით, ასევე თავის აპლიკაციაში ან მესამე პირის ინფორმაციის გაზიარების პლატფორმაზე, მათ შორის, სოციალურ ქსელში, ინფორმაციის განთავსება.

ინტერნეტ მედია მომსახურების მიმწოდებლად ჩაითვლება მაუწყებელი ან სხვა პირი, რომელიც მასობრივი ინფორმაციის სახელმწიფო ენაზე განსახორციელებლად ერთპიროვნულად ფლობს ან სხვასთან ერთად იყენებს ინტერნეტ დომენის და ინტერნეტ ჰოსტინგს", — თქვა გორდულაძემ.

4 მარტს პარლამენტის პლენარულ სხდომაზე მაუწყებლობის შესახებ საქართველოს კანონში ცვლილებებს და მაუწყებლობის შესახებ კანონს პირველი მოსმენით მხარი დაუჭირეს.

გორდულაძის თქმით, ეს მოდელი დიდ ბრიტანეთშიც არსებობს და კანონპროექტის მიზანი საზოგადოებისთვის "სწორი, გადამოწმებული, ჯეროვანი ინფორმაციის და არა პოლიტიკური შეხედულებებით დახუნძლული, თუ პირდაპირ დეზინფორმაციული ხასიათის ფაქტების მიწოდებაა".

"ჩვენ ვიღებთ იმ მოდელს, რომელიც მოქმედებს დიდ ბრიტანეთში და ისევ და ისევ, თუ ბრიტანელ ხალხს შეუძლია, რომ თავიანთი უფლებები დაიცვას, ანალოგიურად, ჩვენც გვაქვს უფლება, რომ ვიცავდეთ ჩვენს უფლებებს და საზოგადოებას აქვს უფლება, რომ მიიღოს სწორი, გადამოწმებული, ჯეროვანი ინფორმაცია და არა პოლიტიკური შეხედულებებით დახუნძლული, თუ პირდაპირ დეზინფორმაციული ხასიათის ფაქტების გავრცელება, რომლის არაერთი მაგალითიც ჩვენ გვაქვს სამწუხაროდ, რისი პრევენციაც ჩვენ გვინდა." — განაცხადა გორდულაძემ.

24 თებერვალს ქართულმა ოცნებამ ორი კანონპროექტი წარადგინა:

1. პირველი კანონპროექტი მაუწყებლებს უცხოური დაფინანსების პირდაპირ და არაპირდაპირ მიღებას უკრძალავს ე.წ FARA (Foreign Agents Registration Act) — "უცხოური აგენტების რეგისტრაციის აქტი".

2. მეორეს კანონპროექტი მაუწყებლობის სტანდარტებში ცვლილებები შეაქვს და ამ სტანდარტების დარღვევაზე რეაგირების შესაძლებლობას კომუნიკაციების კომისიასაც აძლევს.

ცნობისთვის, მანამდე მაუწყებლობის სტანდარტების დარღვევა საქართველოში თვითრეგულირებადი იყო. საქართველოს ჟურნალისტური ეთიკის ქარტია ჟურნალისტთა დამოუკიდებელი გაერთიანებაა, რომლის მისიაა, პროფესიული და ეთიკური სტანდარტის დაცვაა, 9 წევრისგან შემდგარი საბჭო უზრუნველყოფდა მედიის თვითრეგულირების მექანიზმს.

3 მარტს დარგობრივი ეკონომიკისა და ეკონომიკური პოლიტიკის კომიტეტის სხდომაზე მედიის შესახებ კანონში ცვლილებებს მხარი დაუჭირეს. არჩილ გორდულაძის ამავე დღის განცხადებით, ცვლილებები გაზეთებს და ონლაინ-მედიას არ ეხება.

დღევანდელ სხდომაზე, პლენარულ სხდომაზე "მაუწყებლობის შესახებ" კანონში დაგეგმილი ცვლილებების განხილვისას პლენარულ სხდომაზე. დღევანდელ პლენარულ სხდომაზე კომენტარის სახით ასევე აღნიშნა, რომ "დღეს ტელევიზიაზე, რადიოზე შეიძლება გაცილებით მეტი გავლენა მოახდინოს საზოგადოებრივ აზრზე სოციალურ ქსელებში გავრცელებულმა ინფორმაციამ და არსებობს ინფორმაციის სხვა საშუალებებიც ხო? ბეჭდური მედია.. ნუ, სოციალური ქსელები დღეს მაინც ყველაზე დიდ აუდიტორიას მოიცავს და ყველაზე ფართო გავლენის მქონეა და უბრალოდ, კარგი იქნება, დავიწყოთ მუშაობა ამ სფეროში რეგულირებაზეც, რომ ადამიანის ღირსება, ადამიანის პირადი ცხოვრება იყოს დაცული. ადამიანის შეურაცხყოფა იყოს დასჯადი რაღაცნაირად, რომ ადამიანები დავიცვათ."

შეგახსენებთ, 4 მარტის პლენარულ სხდომაზე "ხალხის ძალის" დეპუტატმა, სოზარ სუბარმა განაცხადა, რომ სოციალურ ქსელებში უნდა დაწესდეს რეგულაცია, რომელიც დაიცავს ადამიანის ღირსებას და შეურაცხყოფას დასჯადს გახდის.

"დღეს, ტელევიზიაზე, რადიოზე გაცილებით მეტი გავლენა შეიძლება მოახდინოს საზოგადოებრივ აზრზე, სოციალურ ქსელებში გავრცელებულმა ინფორმაციამ. სოც-ქსელები დღეს ყველაზე დიდ აუდიტორიას მოიცავს და ყველაზე ფართო გავლენის მქონეა და ძალიან კარგი იქნება, ამ სფეროში რეგულირებაზეც დავიწყოთ მუშაობა, რომ ადამიანის ღირსება, პირადი ცხოვრება იყოს დაცული, რომ ის შეურაცხყოფა იყოს დასჯადი," — განაცხადა სოზარ სუბარმა.