აშშ-ის პრეზიდენტი, დონალდ ტრამპი, ევროკავშირს ღვინოსა და სხვა ალკოჰოლურ სასმელებზე 200%-იანი ტარიფების დაწესებით ემუქრება, თუკი ევროკავშირი ამერიკულ ვისკიზე დაწესებულ 50%-იან ტარიფს არ გააუქმებს.

ტრამპის მიერ გამოცხადებული გლობალური სავაჭრო ომის პასუხად, ევროკომისიამ განაცხადა, რომ დაუწესებს საპასუხო ტარიფებს 26 მილიარდი ევროს ღირებულების ამერიკულ პროდუქციას მომდევნო თვიდან.

"ევროკავშირმა, ერთ-ერთმა ყველაზე მტრულად განწყობილმა საგადასახადო და სატარიფო ორგანომ მსოფლიოში, რომელიც ჩამოყალიბდა შეერთებული შტატებისგან სარგებლის მისაღებად, ახლახან ამერიკულ ვისკის 50%-იანი ტარიფი დაუწესა. თუ ეს ტარიფი არ მოიხსნება სასწრაფოდ, აშშ ძალიან მალე დაადებს 200%-იან ტარიფებს ყველა სახეობის ღვინოს, შამპანურსა და ალკოჰოლურ პროდუქტებს, რომლებიც საფრანგეთიდან და ევროკავშირის სხვა ქვეყნებიდან შემოდის. ეს იქნება შესანიშნავი ღვინისა და შამპანურის მწარმოებელი ამერიკული ბიზნესებისთვის", — წერს დონალდ ტრამპი Truth Social-ზე.

ევროსტატის ცნობით, ევროკავშირმა გასულ წელს აშშ-ში 4.9 მილიარდი ევროს ღირებულების ღვინო გაიტანა, რაც ევროკავშირის ღვინის ექსპორტის ჯამური ღირებულების 29%-ს შეადგენს. აშშ-ში ევროკავშირიდან შემავალი ალკოჰოლური პროდუქტის დაახლოებით ნახევარი ფრანგულია, ხოლო 40% — იტალიური.

ტრამპის ფოკუსირებამ ტარიფებზე ბოლო ხანებში ინვესტორები და მომხმარებლები საკმაოდ დააფრთხო და ბაზარზე რეცესიის საფრთხე წარმოშვა. აშშ-ს ურთიერთობა გაუფუჭდა ახლო და უდიდეს სავაჭრო პარტნიორ კანადასთანაც, რადგან, გარდა ტარიფებისა, დონალდ ტრამპმა არაერთხელ გააკეთა განცხადება კანადის აშშ-ის 51-ე შტატად ქცევის გეგმის შესახებ.