თბილისის მერი კახი კალაძე ქართული ოცნების აღმასრულებელი მდივნის, მამუკა მდინარაძის განცხადებას ეხმაურება და ჟურნალისტებთან ამბობს, რომ "დიფ სთეითის" მიზანია, რომ ხელისუფლებაში თავიანთი აგენტურის წარმომადგენელი მოიყვანონ და საკუთარი ინტერესები გაატარონ. თბილისის მერმა ასევე დასძინა, რომ მას აღელვებს თუ როგორ წარიმართება ურთიერთობები საქართველოსა და აშშ-ს შორის და რამდენად შეძლებს ამერიკის პრეზიდენტი, დონალდ ტრამპი "დიფ სთეითის" დამარცხებას.

კალაძემ ასევე განაცხადა, რომ ქართული ოცნება მაშინვე გააკეთებს განცხადებას, როცა "დიფ სთეითის" დამარცხებას იხილავენ.

"ჩვენ დავიწყეთ "დიფ სთეითზე" საუბარი იმიტომ, რომ საქართველოსთან მიმართებაში აღნიშნულ პრობლემას პირდაპირ შევეჩეხეთ. ეს არის სერიოზული გამოწვევა, როგორც ჩვენთვის, ასევე მთელი მსოფლიოსთვის. აშშ-ის პრეზიდენტმა პირდაპირ დააანონსა ბრძოლა "დიფ სთეითის" წინააღმდეგ.

ჩვენ ამ პროცესებს ვაკვირდებით და გვინდა, დონალდ ტრამპს წარმატებები ვუსურვოთ. ჩვენ მას ვგულშემატკივრობთ, თუმცა, პირველ რიგში, გვაღელვებს ჩვენი ქვეყანა. ჩვენ გვაღელვებს ის, თუ როგორ წარიმართება ურთიერთობები და შეძლებს თუ არა "დიფ სთეითის" დამარცხებას. განცხადებას მაშინვე გავაკეთებთ, როცა დავინახავთ, რომ "დიფ სთეითი" დამარცხდა. ეს ჩვენზეც გამოიხატება და ჩვენს თავზეც დავინახავთ," — განაცხადა თბილისის მერმა.

კახი კალაძის თქმით, "დიფ სთეითს" ღმად ჰქონდა საქართველოში ფეხები გადგმული და ქართული ოცნება ერთადერთი ძალაა, რომელიც საქართველოს ინტერესებს და "ხვალინდელ დღეს" იცავს.

"დიფ სთეითს ძალიან ღრმად ჰქონდა ფესვები გადგმული საქართველოში. ხედავთ, წლების განმავლობაში აგენტურის შექმნაში რამხელა თანხები იხარჯებოდა. იმავე მეთოდებით იბრძოდნენ ყველა იმ ქვეყანაში, სადაც თავიანთი ინტერესების გატარების სურვილი ჰქონდათ. დღესაც, მიმდინარეობს ბრძოლა, რომ საქართველო ისევ საკუთარი ინტერესების გასატარებლად გამოიყენონ, რომ ხელისუფლება დაამხონ. კონკრეტული ძალები ამისთვის თანხებს არ იშურებენ. იხარჯება უამრავი ფული, რომ პოლარიზაციის კიდევ უფრო გაღრმავება მოხდეს, საზოგადოება კიდევ უფრო დაუპირისპირდეს ერთმანეთს. ამ ყველაფერს აქვს თავისი მიზეზი, რომ ხელისუფლებაში თავიანთი აგენტურის წარმომადგენელი მოიყვანონ, რომელსაც რასაც დაავალებენ, თავჩაღუნულმა გააკეთოს. აქ ქვეყნის ინტერესებზე საუბარი ზედმეტია. "ქართული ოცნება" კი გახლავთ ერთადერთი ძალა, რომელიც იცავს საქართველოს ინტერესებს და ხვალინდელ დღეს," — განაცხადა კახი კალაძემ.

ცნობისთვის, ოცნების ლიდერი მამუკა მდინარაძე ლიეტუვის, ესტონეთისა და შვედეთის მიერ ოცნების ხელისუფლების კრიტიკასა და ოცნების მაღალჩინოსნებისთვის დაწესებულ სანქციებს ფეისბუქ-პოსტში გამოეხმაურა. მდინარაძეს თქმით, არ არსებობს არანაირი ლიეტუვის, ესტონეთისა თუ შვედეთის ხელისუფლება. ფორმალური თანამდებობის პირები არა მათი ქვეყნის ინტერესების, არამედ გლობალური ომის პარტიის, Deep State-ის კარნახით მოქმედებენ.

"თუ აქამდე გლობალური ომის პარტია ძირითადად USAID-ის და NED-ის საშუალებით აფინანსებდა მათ კონტროლს მიღმა არსებული ეროვნული ხელისუფლებების ჩამოგდებას, ეს მისია კონკრეტული ქვეყნების მარიონეტულმა "მთავრობებმა" აიღეს საკუთარ თავზე," — ვკითხულობთ მდინარაძეს განცხადებაში.