10 მარტს თეატრალურ უნივერსიტეტთან, თეატრალურ უნივერსიტეტის სტუდენტური მოძრაობის მხარდამჭერი აქცია გაიმართა. შეგახსენებთ, რომ გაფიცული სტუდენტების ნაწილმა დღეს მიიღო შეტყობინება, სადაც ნათქვამი იყო, რომ მათ უნივერსიტეტის ეთიკის კომისიამ სტუდენტის სტატუსი შეუწყვიტა.

სტუდენტების სოლიდარობის აქციას შეუერთდა განათლების პოლიტიკის ცენტრის დირექტორი გიორგი ჭანტურია. მისი თქმით, არც ერთხელ ამ ქვეყანაში არ გაუმარჯვია იმას, ვინც ებრძოდა სტუდენტებს და არც ამ შემთხვევაში არ გაიმარჯვებს ეს ბოროტი ძალა.

"რა უნდა იყოს ახლა ამაზე [სტუდენტებისთვის სტუდენტის სტატუსის შეწყვეტაზე] ჩვენი პასუხი თუ არა პროტესტი და წინააღმდეგობა. ჩვენ ვიცით, რომ ყველაფერი ეს პრინციპში მიბმულია იმასთან, რაც ხდება ქვეყანაში და ეს არ არის ბრძოლა მხოლოდ სტუდენტებთან. ეს არის ბრძოლა დამოუკიდებლობისა და თავისუფლებისთვის და არც ერთხელ ამ ქვეყანაში არ გაუმარჯვია იმას, ვინც ებრძოდა სტუდენტებს და არც ამ შემთხვევაში არ გაიმარჯვებს ეს ბოროტი ძალა. ამიტომ, თუ შეიძლება ჩვენი სოლიდარობა გამოვხატოთ სტუდენტებისადმი.

გაუმარჯოს სტუდენტებს!

სოლიდარობა სტუდენტებს!

სტუდენტობა სტუდენტებს!" — განაცხადა აქციაზე გიორგი ჭანტურიამ.


სტუდენტების სოლიდარობის აქციას შეუერთდა ასევე პარტია თავისუფლების მოედნის ერთ-ერთი ლიდერი სიმონ ჯანაშია.

მისი თქმით, ჩვენ არა მხოლოდ უნდა დავეხმაროთ ამ სტუდენტებს, რომ გადავუხადოთ ჯარიმები, ან გავუუქმოთ და აღვადგინოთ უნივერსიტეტში, არამედ უნდა დავეხმაროთ იმაში, რომ ჰყავდეთ ღირსეული პროფესორები და ღირსეული ადმინისტრაცია.

"ირონიულია, რომ ამ უნივერსიტეტის რექტორი არის ადამიანი, რომელიც იყო სანდრო ახმეტელის სახელობის თეატრის მთავარი რეჟისორი. სანდრო ახმეტელი თავის დროზე გარიცხეს გიმნაზიიდან და რომ არ ექვთიმე თაყაიშვილი ის საერთოდ ვერ დაუბრუნდებოდა საგანმანათლებლო სივრცეს. მერე ცხადაია ვიცით რაც დაემართა. ოს იყო რეპრესიების მსხვერპლი. ამ გარიცხვის ეტაპზე ვართ ახლა. ჯერ დახვრებამდე არ მივსულვართ, მაგრამ ასეთი რეჟიმი აუცილებლად მიდის უკიდურეს ზომებამდე. უკიდურესი ზომებია, როცა ადამიანების მოკვეთას ცდილობენ საზოგადოებიდან.

ჩვენ არა მხოლოდ უნდა დავეხმაროთ ამ სტუდენტებს, რომ გადავუხადოთ ჯარიმები, ან გავუუქმოთ და აღვადგინოთ უნივერსიტეტში, არამედ უნდა დავეხმაროთ იმაში, რომ ჰყავდეთ ღირსეული პროფესორები და ღირსეული ადმინისტრაცია", - განაცხადა სიმონ ჯანაშიამ.

შეგახსენებთ, თეატრალური უნივერსიტეტის სტუდენტური მოძრაობის ნაწილმა შეტყობინება მიიღო სტუდენტის სტატუსის შეწყვეტაზე. პუბლიკას ცნობით, ასეთი შეტყობინება 7-მა სტუდენტმა მიიღო.

მოგვიანებით საქართველოს შოთა რუსთაველის თეატრისა და კინოს სახელმწიფო უნივერსიტეტმა სოციალურ ქსელში განცხადება გაავრცელა. სადაც ნათქვამია, რომ რექტორის მიერ ბრძანება სტუდენტების სტატუსის შეწყვეტის შესახებ ჯერ არ არის გამოცემული. სტუდენტებს აქვთ უფლება გაასაჩივრონ ეთიკის კომისიის გადაწყვეტილება და წერილობით მიმართონ რექტორს, სამი სამუშაო დღის განმავლობაში. რექტორს კი ერთი თვის აქვს ვადა თითოეული სტუდენტის საქმის განსახილველად და საბოლოო გადაწყვეტილების მისაღებად.

ასევე იხილეთ: