აშშ-ს პრეზიდენტი, დონალდ ტრამპი, ვიცე-პრეზიდენტი, ჯ.დ. ვენსი და უკრაინის პრეზიდენტი, ვოლოდიმირ ზელენსკი, 28 თებერვალს ოვალურ კაბინეტში პრესის თანდასწრებით მოლაპარაკებებს აწარმოებდნენ.

აშშ-სა და უკრაინის წიაღისეულის შეთანხმებისთვის განკუთვნილ შეხვედრაზე ტრამპმა ზელენსკის უთხრა, რომ მას[ზელენსკის] ამჟამად არ აქვს კარტები რუსეთისა და რუსეთის პრეზიდენტ, ვლადიმერ პუტინის, წინააღმდეგ მიმდინარე ომში. ვენსმა კი ზელენსკი ამერიკელი ხალხის მიმართ უმადურობაში დაადანაშაულა.

"ერთხელ მაინც თუ გვითხარი მადლობა? გამოხატე მადლიერება ამერიკის შეერთებული შტატებისა და პრეზიდენტის მიმართ, რომელიც თქვენი ქვეყნის გადარჩენას ცდილობს" — უთხრა ვენსმა ზელენსკის.

"თქვენ თამაშობთ მილიონობით ადამიანის სიცოცხლით, თქვენ თამაშობთ მესამე მსოფლიო ომით და რასაც აკეთებთ ძალიან დიდი უპატივცემულობაა ამ ქვეყნის მიმართ" — უთხრა ტრამპმა ზელენსკის და აქვე ბაიდენის ადმინისტრაციის კრიტიკა მოაყოლა, უკრაინის მხარდაჭერისა და დაფინანსების გამო.

შეხვედრის შემდეგ, ბევრმა ცნობილმა ადამიანმა და მსოფლიო ლიდერებმა უკრაინასა და პრეზიდენტ ზელენსკის მხარი დაუჭირა და ტრამპისა და ვანსის ბრალდებები გააკრიტიკა.

1. მაიკლ კეინი

მსახიობ მაიკლ კეინის პოსტი: "ტრამპ დამშვიდდი", ინტერნეტში ვირუსულად გავრცელდა.

2. ალისა მილანო

"არც კი ვიცი რა ვთქვა. მივმართავ უკრაინელ ხალხს — მე გხედავთ და ვგრძნობ თქვენ ტკივილს. ვთხოვ ყველა თანამოაზრე საზოგადო მოღვაწეს, მილიარდერს, არჩეულ თანამდებობის პირს, მსოფლიოს ყველა ლიდერს და ხალხს, ვისაც სჯერა დემოკრატიის — დაგვეხმარეთ ამ სიგიჟის დაძლევაში. ამ რეჟიმისა და ფაშიზმის წინააღმდეგ ბრძოლა თქვენზეა დამოკიდებული" — წერს მსახიობი ალისა მილანო და ახალი ამბების გადაცემის ვიდეოს აზიარებს.

3. ელიზაბეტ ბენკსი

მსახიობმა და კინორეჟისორმა ელიზაბეტ ბენკსიმ უკრაინის დროშის სურათი გააზიარა წარწერით: "მე მხარს ვუჭერ უკრაინას".

4. პედრო პასკალი

მსახიობმა, პედრო პასკალმა, ინსტაგრამზე რამდენიმე სთორი გააზიარა, მათ შორის უკრაინის სურათი, რომელზეც ეწერა სიტყვები: "სიმამაცეს აქვს სახელი".

მსახიობმა ასევე პრეზიდენტი ზელენსკის ფოტო გააზიარა სიტყვებით: "დარჩით ისტორიის სწორ მხარეს".

5. ლივ შრაიბერი

მსახიობმა ლივ შრაიბერმა, BlueCheck Ukraine-ის დამფუძნებლებთან ერთად ვრცელი პოსტი გამოაქვეყნა, რომელშიც ნათქვამია: "მე არასდროს შემიწყვეტია უკრაინის მხარდაჭერას, მაგრამ ოვალურ კაბინეტში განვითარებული აბსოლუტურად სამარცხვინო მოვლენების შემდეგ, ამის გამეორება საჭირო გახდა".

6. ნატაშა როტველი

თეთრი ლოტუსის მსახიობმა, ნატაშა როტველმა, რომელიც ტრამპს აქტიურად აკრიტიკებს, ტრამპის სურათი გამოაქვეყნა წარწერით: "ტრამპი ზელენსკის მე-3 მსოფლიო ომით თამაშში სდებს ბრალს, ამაზრზენია!"

7. ბენ სტილერი

სათქმელი მოკლედ გადმოსცა მსახიობმა და Severance-ის აღმასრულებელმა პროდიუსერმა, ბენ სტილერმა. მან უკრაინის დროშის emoji X-ზე გააზიარა.

8. კერი კუნი

ძალიან პირდაპირი იყო თეთრი ლოტუსის კიდევ ერთი მსახიობი, კერი კუნი, რომელმაც სოციალურ ქსელში პოსტი გამოაქვეყნა: "ერთი რამ ცხადია: ვიცე-პრეზიდენტი ჯ.დ. ვენსი დიდი ნაბიჭვარია".

ცნობილი ადამიანების გარდა კრიტიკული მოსაზრება ოვალურ კაბინეტში შემდგარ დიალოგზე გააზიარეს მსოფლიო ლიდერებმა კანადიდან, ავსტრალიიდან, ინგლისიდან, საფრანგეთიდან, გერმანიიდან, იტალიიდან, ესპანეთიდან და ა.შ.