მას შემდეგ რაც 4 მარტს აშშ-ის პრეზიდენტმა, დონალდ ტრამპმა კანადიდან იმპორტირებულ პროდუქტებზე 25%-იანი, ხოლო ჩინურ საქონელზე — ტარიფი გააორმაგა 10%-დან 20%-მდე, კანადა და ჩინეთი ამერიკულ საქონელზე საპასუხო ტარიფებს აწესებენ.

კანადის პრემიერმინისტრმა, ჯასტინ ტრუდომ განაცხადა, რომ თუ ამერიკული ტარიფები 4 მარტის ღამეს ამოქმედდება, კანადა 107 მილიარდი დოლარის ამერიკულ საქონელზე 25%-იან ტარიფებს დააწესებს.

"კანადა ამ გაუმართლებელ გადაწყვეტილებას პასუხის გარეშე არ დატოვებს. თუ ამერიკული ტარიფები დღეს ღამიდან ამოქმედდება, მაშინ კანადა ხვალ, 00:01 საათიდან 155 მილიარდი კანადური დოლარის (107 აშშ დოლარი) ღირებულების საქონელზე 25%-იანი ტარიფების დაწესებით უპასუხებს," — აცხადებს ჯასტინ ტრუდო.

ჯასტინ ტრუდომ ასევე დასძინა, რომ 30 მილიარდის ღირებულების საქონელზე ტარიფები ძალაში მაშინვე შევა, ხოლო დარჩენილ 125 მილიარდის ღირებულების ამერიკულ საქონელზე ტარიფები 21 დღის შემდეგ ამოქმედდება.

ტრამპის მიერ ჩინეთისთვის ტარიფების გაორმაგებას ეხმაურება ჩინეთიც. ჩინეთის სახელმწიფო საბჭოს სატარიფო კომისიის განცხადებაში აღნიშნულია, რომ 15%-იანი ტარიფი დაწესდება — ქათმის ხორცზე, ხორბალზე, სიმინდსა და ბამბაზე. 10%-იანი ტარიფი კი დაწესდება: სორგოზე, სოიოზე, ღორისა და საქონლის ხორცზე, წყლის პროდუქტებზე, ხილზე, ბოსტნეულსა და რძის პროდუქტებზე.

შეგახსენებთ, პრეზიდენტმა ტრამპმა მექსიკასა და კანადაზე 25%-იანი ტარიფები თებერვალში დააწესა, ხოლო ჩინეთზე — 10%-იანი. ოტავამ და მეხიკომ ერთთვიან გადავადებაზე შეთანხმება შეძლეს, მაგრამ ეს ვადა ამოიწურა.

ჩინური გამოცემა Global Times წერდა, რომ პეკინი განიხილავს აშშ-დან სოფლის მეურნეობის პროდუქტებისა და საკვები პროდუქტების იმპორტზე დამატებითი ტარიფების შემოღებას. შეზღუდვების დაწესების შესახებ ტრამპის გადაწყვეტილების შემდეგ, ჩინეთმა უკვე დააწესა რიგი საპასუხო ზომები, მათ შორის 15%-იანი ტარიფი ნახშირზე და თხევად ბუნებრივ აირზე შეერთებული შტატებიდან.

ასევე იხილეთ:

ტრამპი ჩინეთიდან იმპორტირებულ საქონელზე ტარიფს აორმაგებს, მექსიკისა და კანადისთვის დაწესებული 25 %-იანი ტარიფები დღეიდან ამოქმედდება