საქართველოს განვითარების ფონდის სამართლის თემატური ჯგუფის ხელმძღვანელი, დავით ჯანდიერი მიიჩნევს, რომ ნაკლებად სავარაუდოა, ევროსასამართლოს დიდმა პალატამ საერთოდ განიხილოს ხელისუფლების საჩივარი ვანო მერაბიშვილთან დაკავშირებით გამოტანილი გადაწყვეტილებაზე. იუსტიციის მინისტრმა თეა წულუკიანმა 14 ივნისს განაცხადა, რომ ის აუცილებლად გაასაჩივრებს ევროსასამართლოს იმ გადაწყვეტილებას, რომლის მიხედვითაც, ევროსასამართლომ დაადგინა, რომ ვანო მერაბიშვილთან მიმართებაში საქართველომ დაარღვია ადამიანის უფლებათა კონვენციის 5.3 და მე-18 მუხლები.

დავით ჯანდიერი 2012 წლიდან გარკვეული პერიოდის განმავლობაში თეა წულუკიანის მოადგილე იყო. მან 2007 წელს რობერტ შუმანის სახელობის სტრასბურგის უნივერსიტეტის ევროპული სწავლების უმაღლესი სკოლაში მიიღო მაგისტრის ხარისხი ადამიანის უფლებათა ევროპულ სამართალში.

დავით ჯანდიერმა ევროსასამართლოს მიერ 14 ივნისს გამოქვეყნებულ გადაწყვეტილებასთან დაკავშირებით ტელეკომპანია კავკასიას ეთერში, გადაცემა ბარიერში ისაუბრა:

"საქმის გასაჩივრება არ ნიშნავს ავტომატურად დიდი პალატის მიერ საქმის განხილვას, სამი თვის ვადაში უნდა გასაჩივრდეს გადაწყვეტილება, მაგრამ გადაწყვეტილება უნდა გასაჩივრდეს იმ საფუძვლით, რომ ის მოითხოვს დიდი პალატის წინაშე განხილვას, ვინაიდან დაკავშირებულია კონვენციის, ან მისი ოქმის ინტერპრეტაციის საკითხთან. ეს არ არის იმ ტიპის გადაწყვეტილება, რომელიც კონვენციის ინტერპრეტაციას უკავშირდება. ეს უფრო სტანდარტული ტიპის გადაწყვეტილებაა, ამიტომ ნაკლებად სავარაუდოა, რომ დიდი პალატის ხუთმა მოსამრთლემ რომელიც მსჯელობს დასაშვებობაზე, საქმე მიიღოს წარმოებაში. თუ არ მიიღებს წარმოებაში, მაშინ კანონიერ ძალაში შედის გადაწყვეტილება და ეგზავნება ავტომატურად მინისტრთა კომიტეტს აღსასრულებლად".