ბრიტანეთის პრემიერმინისტრმა, კირ სტარმერმა აშშ-ის პრეზიდენტ დონალდ ტრამპთან შეხვედრის შემდეგ განაცხადა, რომ უკრაინაში სტაბილური მშვიდობის უზრუნველსაყოფად უსაფრთხოების გარანტიებია საჭირო და ამისთვის ბრიტანეთი მზადაა, რომ უკრაინაში ჯარი და თვითმფრინავები გაგზავნოს. ამის შესახებ ინფორმაციას The Independent ავრცელებს.

"ჩვენ მშვიდობა უნდა მოვიპოვოთ და ეს არის ის, რაც ახლა უნდა გავაკეთოთ, რადგან ეს არ შეიძლება იყოს ისეთი მშვიდობა, რომელიც აგრესორს დააჯილდოებს ან წაახალისებს ისეთ რეჟიმებს, როგორიცაა ირანი", — ხაზგასმით აღნიშნა მან.

სტარმერმა თქვა, რომ მან ტრამპთან განიხილა გეგმა პუტინის შესაჩერებლად "მკაცრი და სამართლიანი მშვიდობის" მისაღწევად. მისი თქმით, სამშვიდობო ძალისხმევის მხარდასაჭერად, მშვიდობის უზრუნველსაყოფად და აგრესორის შესაკავებლად ერთადერთი გზა უკრაინაში ჯარების და თვითმფრინავების გაგზავნაა.

"ჩვენ ვიღებთ დიდ პასუხისმგებლობას უსაფრთხოებაზე. მე მჭიდროდ ვმუშაობ სხვა ევროპელ ლიდერებთან ამ საკითხზე. გაერთიანებული სამეფო მზადაა განალაგოს ჯარები ხმელეთზე და თვითმფრინავები ჰაერში, რათა მხარი დაუჭიროს შეთანხმებას ჩვენს მოკავშირეებთან ერთად, რადგან ეს არის ერთადერთი გზა მშვიდობის შესანარჩუნებლად", — ხაზგასმით აღნიშნა ბრიტანეთის პრემიერმა.

ვოლოდიმირ ზელენსკის მიერ იშვიათი მინერალების შეთანხმების ხელმოწერამდე 1 დღით ადრე, 27 თებერვალს, აშშ-ის პრეზიდენტი, დონალდ ტრამპი, ბრიტანეთის პრემიერ კირ სტარმერს შეხვდა. სტარმერამდე, ტრამპთან ოფიციალური შეხვედრა გამართა საფრანგეთის პრეზიდენტმა ემანუელ მაკრონმაც. ევროპული ქვეყნების ლიდერები აშშ-ის პრეზიდენტთან ევროპისა და შეერთებული შტატების ურთიერთობის მოსაგვარებლად, სამომავლო გეგმების განსახილველად და უკრაინის ომთან დაკავშირებული საკითხების შესათანხმებლად ჩავიდნენ.

დღეს, 28 თებერვალს დონალდ ტრამპი უკრაინის პრეზიდენტ ვოლოდიმირ ზელენსკის შეხვდება და ორი ქვეყნის პრეზიდენტები გააფორმებენ ხელშეკრულებას იშვიათი ლითონებისა და უკრაინის აღდგენის შესახებ.