კანადის პრემიერმინისტრმა, ჯასტინ ტრუდომ კიევში გამართულ პარტნიორების სამიტზე — "დაუჭირე მხარი უკრაინას" განაცხადა, რომ კანადა გაყინული რუსული აქტივებიდან $5 მლრდ-ს უკრაინას გადასცემს.

"ჩვენ ასევე გადავცემთ უკრაინის დახმარების პირველ ტრანშს 5 მილიარდი დოლარის ოდენობით, რომელიც დაფინანსდება გაყინული რუსული აქტივებიდან მიღებული შემოსავლებით", — თქვა ტრუდომ.

მისი თქმით, ეს ომი უკრაინის პროვოცირებული არ არის და რუსეთმა საკუთარი იმპერიის გასაფართოებლად დაიწყო.

"ეს არ არის ის კონფლიქტი, რომელიც უკრაინას სურდა ან მისი პროვოცირება მოახდინა. ეს ომი დაიწყო ერთი მიზეზის გამო — რუსეთის სურვილი წაშალოს უკრაინის ისტორია და გააფართოოს თავისი იმპერიის ტერიტორია. რუსეთის ფედერაციის ქმედებები სხვა არაფერია, თუ არა პირდაპირი თავდასხმა. ჩვენ ყველაფერი უნდა გავაკეთოთ იმისათვის, რომ უკრაინამ მიიღოს გრძელვადიანი მშვიდობა, რაც შეუძლებელია უკრაინელების გარეშე მოლაპარაკების მაგიდასთან", — თქვა ტრუდომ.

კანადის პრემიერმა პარტნიორებს მოუწოდა, გაზარდონ დახმარება უკრაინაში. მან ასევე განაცხადა, რომ კიევი მიიღებს დამატებით 25 LAV III ქვეითთა საბრძოლო მანქანას და სხვა სახის იარაღს.