ქუთაისის სააპელაციომ სასამართლომ მზია ამაღლობელის ინტერესების დამცველი ადვოკატების — მაია მწარიაშვილის, ჯუმბერ ქათამაძისა და რაჟდენ ხიმშიაშვილის საჩივარი ბათუმის საქალაქო სასამართლოს 2025 წლის 14 თებერვლის განჩინებაზე დაუშვებლად ცნო.

შეგახსენებთ, რომ 13 თებერვალს მზია ამაღლობელის გათავისუფლების შუამდგომლობა ბათუმის საქალაქო სასამართლოში წარადგინეს, თუმცა მოსამართლე ლევან ყოლბაიამ ის დაუშვებლად ცნო. საქართველოს ახალგაზრდა იურისტთა ასოციაციის შეფასებით, ბათუმის საქალაქო სასამართლოს მიერ მიღებული გადაწყვეტილება უკანონოა.

ნეტგაზეთისა და ბათუმელების დამფუძნებელი 12 იანვარს დააკავეს. მზია ამაღლობელმა შიმშილობის 38-ე დღეს წერილი გამოგზავნა ციხიდან, სადაც ეწერა, რომ შეეცდებოდა, მიმდინარე კვირაში კვება აღედგინა. მზია ამაღლობელი ამ დრომდე კლინიკაში რჩება.

"ბათუმში ოცნების ქალაქში მომხდარი ტრაგედიის, ორი არასრულწლოვანი ბავშვის თხრილში ჩავარდნის და დაღუპვის ფონზე ჩემს ჯანმრთელობასა და სიცოცხლეზე წუხილის მოსმენა წარმოუდგენლად მძიმეა ჩემთვის. ამ დღეებში ექიმები დახმარებით შევეცდები, როგორმე შევძლო კვების აღდგენა. სინდისის პატიმრებს - თემურ ქათამაძეს, ნიკოლოზ ჯავახიშვილს მადლობა სოლიდარობისთვის. ვთხოვთ, მათაც შეწყვიტონ შიმშილობა. განსაკუთრებულ პასუხისმგებლობას ვგრძნობ ჩემი თანამოაზრეების, კოლეგების, მეგობრებისა და ოჯახის მიმართ. არ მინდა ჩემმა შიმშილობამ დაგასუსტოთ. თქვენ ჩემს ნაცვლადაც უნდა იბრძოლოთ," — წერს მზია ამაღლობელი კლინიკიდან გამოგზავნილ წერილში.