პომპეზურად გაფორმებული გადასაღები მოედნებით, ესთეტიკური კინოს ახალ დონეზე აყვანითა და ზეადამიანური სიუჟეტების შექმნით სახელგანთქმული რეჟისორი, უეს ანდერსონი, ახალ ფილმზე მუშაობს. რეჟისორის წინა ორმა ფილმმა, Asteroid City (2023) და The French Dispatch (2021) კრიტიკოსების აღფრთოვანებაც გამოიწვია და კომერციულადაც დიდ წარმატებას მიაღწია, ამიტომ მისმა უახლესმა პროექტმა ჰოლივუდში დიდი მითქმა-მოთქმა გამოიწვია. ამ სტატიაში მოგიყვებით ყველაფერს, რაც ფილმის შესახებ ვიცით:

ეს იქნება ბნელი ამბავი აგენტურასა და სიმდიდრეზე

The Phoenician Scheme (ფინიკიური სქემა) კინოთეატრებში ამ წლის მაისში გამოდის და როგორც ვიცით, ფილმში მთავარ როლებს ბენისიო დელ ტორო და მაიკლ სერა შეასრულებენ.

2023 წლის ივნისში Le Monde-სთან ინტერვიუში რეჟისორმა აღნიშნა, რომ მისი ახალი ფილმის სიუჟეტი ჯაშუშებზე იქნება და შავბნელ ტონში მამისა და ქალიშვილის ურთიერთობაზე გვიამბობს. ბენისიო დელ ტორო ჟა ჟა კორდას, ევროპის უმდიდრესი კაცის როლს შეასრულებს, მისი შვილს კი ქეით უინსლეტის შვილი, მია თრიეპლტონი განასახიერებს, მაიკლ სერა კი მისი მასწავლებლის, ბიორნ ლუნდის როლში მოგვევლინება. როგორც ჩანს, ფილმი ამ სამი პერსონაჟის ირგვლივ განვითარდება.

ბენისიო დელ ტორო ფილმის ყველა კადრში გამოჩნდება

ოსკაროსანი მსახიობი, რომლისთვისაც, The French Dispatch-ის შემდეგ, ეს ვეს ანდერსონის მეორე ფილმი იქნება, ამჯერად ცენტრალური ფიგურის ამპლუაში მოგვევლინება. როგორც ირკვევა, ბენისიო დელ ტორო ფილმის თითოეულ კადრში გამოჩნდება. თუმცა, ეს იმას არ ნიშნავს, რომ ანდერსონისთვის ჩვეული, ვარსკვლავებით დახუნძლული ქასთით ტკბობის სიამოვნება მოგვაკლდება.

სერასა და თრიეპლტონთან ერთად ფილმში დამტკიცებულები არიან სკარლეტ იოჰანსონი, ტომ ჰენკსი, ბრაიან კრენსტონი, ბენედიქტ ქამბერბეჩი, რიზ აჰმედი, შარლოტ გინზბერგი, უილემ დეფო, ჯეფრი ვრაითი და სხვები.

ფილმზე ანდერსონის ჩევული გუნდი იმუშავებს

ცნობილია, რომ რეჟისურის გარდა, ანდერსონი თავისი ფილმების სცენარებზეც მუშაობს ხოლმე. გამონაკლისი არც The Phoenician Scheme ყოფილა — ანდერსონმა ეს სცენარი მის ჩვეულ კოლეგასთან, რომან კოპოლასთან ერთად დაწერა. კომპოზიტორი ალექსანდერ დესპლა, რომელმაც The Grand Budapest Hotel-ის, Asteroid City-ის, The French Dispatch-ისა და Isle of Dogs-ის მუსიკა დაწერა, ფინიკიურ სქემაშიც დაბრუნდება და ახალ, დასამახსოვრებელ მელოდიებსაც შემოგვთავაზებს.

როდის გამოვა ფილმი დიდ ეკრანებზე?

როგორც ცნობილია, ფილმი თავდაპირველად ექსკლუზივის სახით მხოლოდ რამდენიმე კინოთეატრში გამოვა, ფართო მასშტაბის აუდიტორიას კი 6 ივნისიდან შეეძლება ანდერსონის ახალი ნამუშევრის ნახვა.