კეირ სტარმერმა განაცხადა, რომ ის "მზადაა და სურვილი აქვს", სამშვიდობო შეთანხმების ფარგლებში, მშვიდობის დასაცავად, უკრაინის ტერიტორიაზე ბრიტანელი სამხედროები გაგზავნოს.

გაერთიანებული სამეფოს პრემიერმინისტრმა განაცხადა, რომ ხანგრძლივი მშვიდობის მიღწევა აუცილებელია, თუკი მსოფლიოს პუტინის შეჩერება და მისგან მომავალი აგრესიის შეჩერება სურს.

"გაერთიანებული სამეფო მზად არის წამყვანი როლი შეასრულოს უკრაინის უსაფრთხოების გარანტიებზე მუშაობის დაჩქარებაში. ეს მოიცავს უკრაინის არმიის შემდგომ მხარდაჭერას - სადაც გაერთიანებულმა სამეფომ უკვე აიღო ვალდებულება წელიწადში 3 მილიარდი ფუნტის უზრუნველყოფაზე მინიმუმ 2030 წლამდე. მაგრამ ეს ასევე ნიშნავს მზადყოფნას, შევიტანოთ წვლილი უკრაინის უსაფრთხოების გარანტიებში, საჭიროების შემთხვევაში ადგილზე საკუთარი ჯარების განთავსებით. ამას მსუბუქად არ ვამბობ. ღრმად ვგრძნობ პასუხისმგებლობას, რომელიც თან ახლავს ბრიტანელი სამხედროების პოტენციურად საფრთხის წინაშე დაყენებას", — წერს სტარმერი.

ინფორმაციისთვის, დღეს პარიზში საფრანგეთის პრეზიდენტის, ემანუელ მაკრონის მოწვევით, ევროპელი ლიდერების სამიტი გაიმართება, რომელზედაც უკრაინის წინააღმდეგ რუსეთის ომისა და ევროპის უსაფრთხოების საკითხებს განიხილავენ.

შეგახსენებთ, აშშ-ის ახალი პრეზიდენტის ადმინისტრაცია აქტიურ მოლაპარაკებებს აწარმოებს რუსეთთან უკრაინაში სამშვიდობო შეთანხმების მისაღწევად, თუმცა ტრამპის სპეციალური წარმომადგენლის, კიტ კელოგის განცხადებით, მოლაპარაკებების მაგიდასთან ევროპა არ იქნება წარმოდგენილი.