უკრაინის პრეზიდენტმა ვოლოდიმირ ზელენსკიმ თქვა, რომ მიუხედავად იმისა, რომ ტრამპის ადმინისტრაცია არ არის მზად, ისაუბროს მისი ქვეყნის ნატოში მომავალ წევრობაზე, ის უკრაინის უსაფრთხოების საუკეთესო გარანტიად რჩება.

“დღევანდელი ამერიკა და პრეზიდენტი ტრამპი მზად არ არიან ისაუბრონ ნატოში (უკრაინის წევრობაზე). ამას ღიად ამბობენ,” — განაცხადა ზელენსკიმ მიუნხენის უსაფრთხოების კონფერენციაზე აშშ-ს ვიცეპრეზიდენტ ჯეი დ ვენსთან შეხვედრის წინ ჟურნალისტებთან.

მაგრამ ზელენსკიმ ხაზგასმით აღნიშნა, რომ “უსაფრთხოების გარანტიებისთვის” უკრაინას კვლავ სურს ალიანსში გაწევრიანება.

“ჩვენ ვენდობით ნატოს, ვენდობით უსაფრთხოების ამ გარანტიებს. მე პრაგმატული და გულწრფელი ვარ, ეს ყველაზე იაფი ვარიანტია ყველასთვის, “ — განაცხადა ვოლოდიმირ ზელენსკიმ.

უკრაინის პრეზიდენტის შეფასებით, სანამ უკრაინა NATO-ში არ არის, მის ქვეყანას 1,5 მილიონიანი არმია ესაჭიროვება.

"დღეს ჩვენი არმია, საბრძოლო ბრიგადების რაოდენობა ორჯერ ნაკლებია, ვიდრე ჩვენ გვჭირდება 1,5 მილიონი,” — განაცხადა პრეზიდენტმა.

ზელენსკის შეფასებით, ამჟამინდელი უკრაინის სამხედრო ბიუჯეტი 40 მილიარდი დოლარია, რაც 50% უნდა გაიზარდოს.