2025 წლის იანვარში საქართველოში 481 მილიონი დოლარის (1.35 მლრდ ლარის) ღირებულების ნახატები შემოვიდა. როგორც bm.ge წერს, ხელოვნების ნიმუშები 3 ამანათად შემოვიდა – აქედან ორი აშშ-დან, ერთი კი დიდი ბრიტანეთიდან. ნახატების და მათი გადასატანი ყუთების წონა 6.6 ტონას შეადგენდა.

პარტია საქართველოსთვის წევრი ბექა ლილუაშვილი სოციალურ ქსელში წერს, რომ ხელოვნების ნიმუშები საქართველოში ბიძინა ივანიშვილმა შემოიტანა.

"დაიწყო ივანიშვილის მილიარდი დოლარის ღირებულების ხელოვნების ნიმუშების გადმოქაჩვა საქართველოში — ეს ფინანსთა სამინისტროს მიერ გამოქვეყნებულ იმპორტის ოფიციალურ სტატისტიკაშია მოცემული:

თითქმის 500 მლნ დოლარის ღირებულების ძვირადღირებული ნახატები.

მათ შორის, აშშ-დან, რაც ნიშნავს, რომ ტრამპთან "დალაგებულ" ივანიშვილს სინამდვილეში ვერაფერიც დაულაგებია, იქიდანაც მოარბენინებს ნახატებს", — წერს ლილუაშვილი.

Bm.ge-ის ინფორმაციით, 2025 წლის იანვარში საქართველოში იმპორტი 45%-ით, 1.6 მილიარდ დოლარამდე გაიზარდა. შესაბამისად, აღნიშნული ზრდის მთავარი მიზეზი ქვეყანაში ხელოვნების ნიმუშების შემოტანა იყო. ამის გარეშე იმპორტი მხოლოდ 1.1 მილიარდი დოლარი იქნებოდა, წლიური ზრდა კი 1.8%.

"იმპორტის ჭრილში 45%-იანი ზრდა თანაც იანვარში არის ძალიან მაღალი და მთავრობის განცხადება, რომ ეს ეკონომიკის შიდა მოხმარების ზრდას უკავშირდება, არის სინამდვილეში ერთი ადამიანის მიერ განხორციელებული ტრანზაქცია და მისი ისტერიული შიშები, რომ მისი ქონება არ დაიკარგოს და არა რაღაც ეკონომიკური ბუმი, რომელმაც ეკონომიკა უნდა გააჯანსაღოს", — აცხადებს ბექა ლილუაშვილი Bm.ge-სთან.

საქონლის განბაჟება 2025 წლის იანვარში განხორციელდა. უცნობია, მასზე დღგ-ის 18% გადაიხადეს თუ არა, რაც 86.5 მილიონ დოლარს, ანუ 242 მილიონ ლარს შეადგენდა.

ამასთან იმის გათვალისწინებით, რომ იანვარში გადახდილი დღგ-ის მოცულობა ზრდის ნაცვლად, პირიქით 0.9%-ით შემცირდა და 806 მილიონი ლარი შეადგინა, სავარაუდოდ, აღნიშნული საქონლის ქვეყანაში შემოტანა დღგ-ის გადახდის გარეშე განხორციელდა. წინააღმდეგ შემთხვევაში ბიუჯეტში შესული დღგ-ს მოცულობა უკანასკნელი რამდენიმე თვის მაჩვენებელს საგრძნობლად გადააჭარბებდა, რაც არ მომხდარა.

შეხსენებისთვის, 2024 წელს ქართული ოცნების პარლამენტმა მიიღო კანონი, რომლის მიხედვითაც აქტივები, რომლებიც არის ოფშორული კომპანიების საკუთრებაში, საქართველოში გადმოტანის გადასახადებისგან თავისუფალია.