აშშ-ის პრეზიდენტმა დონალდ ტრამპმა განაცხადა, რომ ისრაელსა და ჰამასს შორის ცეცხლის შეწყვეტის შესახებ შეთანხმება უნდა გაუქმდეს, თუ ღაზას სექტორში მყოფი ყველა მძევალი არ გათავისუფლდება "შაბათს შუადღემდე". ინფორმაციას Associated Press ავრცელებს.

ჟურნალისტებთან შეხვედრისას ტრამპმა არაერთი რეზონანსული განცხადება გააკეთა ისრაელსა და ჰამასს შორის კონფლიქტში არსებულ ვითარებასთან დაკავშირებით. ტრამპმა აღნიშნა, რომ ჰამასმა დაუყოვნებლივ უნდა გაათავისუფლოს ყველა მძევალი, წინააღმდეგ შემთხვევაში ცეცხლის შეწყვეტის შეთანხმება აზრს კარგავს.

"თუ ისინი აქ არ იქნებიან, ნამდვილი ჯოჯოხეთი დაიწყება", — თქვა პრეზიდენტმა. მისი ვარაუდით, ბევრი მათგანი, ვისი გათავისუფლებაც იყო დაგეგმილი, სინამდვილეში უკვე მკვდარია.

ამასთან, მან აღიარა, რომ შეთანხმების შესახებ საბოლოო გადაწყვეტილება ისრაელს რჩება.

"ეს ჩემი სიტყვაა. ისრაელს გადაწყვეტილების შეცვლა შეუძლია", — თქვა აშშ-ს პრეზიდენტმა.