რუსეთის ფედერაციის საგარეო საქმეთა მინისტრის მოადგილემ, მიხაილ გალუზინმა გამოცემა იზვესტიასთან რუსეთ-საქართველოს ურთიერთობებზე ისაუბრა. გალუზინის თქმით, რუსეთი ამჩნევს ქართული ოცნების "პრაგმატულ" პოლიტიკას და ამიტომ, მზად არის ორ ქვეყანას შორის ურთიერთობების გასაღრმავებლად.

"ქართული ოცნების ხელისუფლების პრაგმატული ხაზის შესაბამისად, ვდგამდით და ვდგამთ ნაბიჯებს რუსულ-ქართული თანამშრომლობის გასაზრდელად, პირველ რიგში, ჩვენი ქვეყნების ინტერესების შესაბამისად", — განაცხადა გალუზინმა.

გალუზინმა ისაუბრა საქართველოში მიმდინარე მოვლენებზეც, მისი თქმით, ქვეყანაში არსებული რთული ვითარება დასავლეთიდან მომავალი დესტაბილიზაციის მცდელობაა.

"დასავლეთი არ წყვეტს ძალისხმევას სამხრეთ კავკასიის დესტაბილიზაციისთვის. ამის თვალსაჩინო მაგალითია საქართველო. აშშ-მა და ევროკავშირმა გადაწყვიტეს დემონსტრაციულად დაესაჯათ ქვეყანა, რომელმაც მოულოდნელად "გაბედა" თამაში საკუთარი და არა მათი დაწესებული წესებით", — განაცხადა ლავროვის მოადგილემ.