ბათუმელების და ნეტგაზეთის დამფუძნებელი და დირექტორი მზია ამაღლობელი უკვე 30 დღეა შიმშილობს.

საიას ხელმძღვანელი ნონა ქურდოვანიძის თქმით, მზია ამაღლობელი აგრძელებს შიმშილობას და პენიტენციურ დაწესებულებაში დაბრუნებას ითხოვს. მისივე თქმით, კვლევების შედეგების მიხედვით გადაწყდება, დარჩება ის კლინიკაში, თუ დააბრუნებენ საპატიმროში.

"ის [ამაღლობელი] აგრძელებს სრულ შიმშილობას და აქ [ვივამედში] რჩება დამატებითი გამოკვლევების ჩატარების მიზნით, თუმცა, მისი პოზიცია ასევე არის უცვლელი, რომ მოითხოვს დააბრუნონ პენიტენციურში, მაგრამ, რა თქმა უნდა, ამ ყველაფერთან დაკავშირებით გადაწყვეტილება უნდა იყოს მიღებული სამედიცინო კვლევების შედეგებზე დაყრდნობით და არ არის აქ მხოლოდ მისი სურვილი და გადამწყვეტია როგორი იქნება სამედიცინო ჩვენება.

მას როგორც უთხრეს ექიმებმა, დღეს ჩაუტარდება დამატებითი კვლევები, რის შემდეგაც ექიმები გადაწყვეტენ ისევ ვივამედში დატოვებენ თუ იქნება ისეთი მდგომარეობა, რომ შესაძლებელი იქნება უკან დაბრუნება," — განაცხადა საიას ხელმძღვანელმა, ნონა ქურდოვანიძემ ტვ პირველთან საუბრისას.