დღეს, 9 თებერვალს ახალი თეატრის საპროტესტო მანიფესტს გურიაში წარადგენს.

ოზურგეთის ცენტრში მოწყობილ სცენაზე გამოსვლისას მსახიობმა კახა კინწურაშვილმა მადლობა გადაუხადა ადგილობრივებს გვერდში დგომისთვის და თქვა, რომ მათ წინააღმდეგ არის რეჟიმი, რომელიც მოშიმშილე ქალისგან ითხოვს ბოდიშს და ეს რეჟიმი ლაპარაკობს ღირსებასა და ფასეულობებზე, მაგრამ მათ მხარეს არ არის არც ღირსება და არც ფასეულობები.

"ჩვენ გვეუბნებოდნენ, რომ ოზურგეთში ადამიანები გარეთ არ გამოვლენ. და ჩვენ ამის არ გვჯეროდა. თითოეულმა ჩვენგანმა იცის როგორი წნეხია ჩვენს ქალაქებში, ჩვენს სოფლებში. მიუხედავად ამისა, ადამიანები ხელს კიდებენ ერთმანეთს და იბრძვიან უკეთესი მომავლისთვის. ჩვენს წინააღმდეგ არის რეჟიმი, რომელიც ქუჩებში სცემს ადამიანებს, საპყრობილეში გზავნის იმ ახალგაზრდებს, რომლებმაც უნდა შექმნან ჩვენი ქვეყნის მომავალი. ეს არის რეჟიმი, რომელიც მოშიმშილე ქალისგან ითხოვს ბოდიშს და ეს რეჟიმი ლაპარაკობს ღირსებაზე და ფასეულობებზე, მაგრამ მათ მხარეს არ არის არც ღირსება და არც ფასეულობები. მათ მხარეს არის მხოლოდ და მხოლოდ ძალაუფლების სურვილი. ჩვენ გვინდა, რომ ვიცხოვროთ უკეთეს ქვეყანაში და დარწმუნებული ვარ, ჩვენ ყველა ერთად ამას მივაღწევთ", — თქვა კახა კინწურაშვილმა.

მსახიობ ნანკა კალატოზიშვილის თქმით, სადაც არ უნდა ჩავიდნენ, ქალაქი იქნება თუ რეგიონი, ყველგან არის გაჭირვება და ძლიერი სოფლის გარეშე ქვეყანა ფეხზე ვერასდროს ვერ დადგება.

"ე.წ. ხელისუფლება დაკავებულია ხოლმე ადამიანების თვლით — სადღაც ჩადიხარ და ამბობენ, რომ არ დაგვხვდა ბევრი ადამიანი, აქციაზე 200 000 ადამიანია და ამბობენ, რომ 5000 იყო. მთელი უბედურება იმაშია, რომ სულ რომ 10 ადამიანი იდგეს, იმ 10 ადამიანს უნდა მოუსმინო. იმ 10 ადამიანის ხმა უნდა გაიგონო და ძალიან მიხარია, რომ სადაც ჩავდივართ, იქაური ადამიანები მოდიან სცენაზე და თავიანთ პრობლემებზე გვიყვებიან და ჩვენ ჩვენს პრობლემებზე ვსაუბრობთ.

ქალაქი იქნება თუ რეგიონი, ყველგან არის გაჭირვება და თუ არ ვილაპარაკეთ ამ გაჭირვებაზე, ამ მოჯადოებულ წრეს ვერ გავარღვევთ. ამაზე ლაპარაკი არ არის სათაკილო. ჩვენი მოსახლეობის მესამედი სიღარიბის ზღვარს მიღმაა, 600 000 ადამიანი იღებს სოციალურ შემწეობას და 200 000-ზე მეტი ელოდება, რიგშია ჩამდგარი. თვლა ხომ უყვართ, აღრიცხვა ხომ გააკეთეს, მაგრამ ამ პრობლემის მოგვარება სადმე ხედავთ? მე, პირადად, ვერ ვხედავ. ძლიერი სოფლის გარეშე ვერ დადგება ქვეყანა ფეხზე ვერასდროს და პრიორიტეტი უნდა იყოს სოფელი, რეგიონი, რაიონი", — განაცხადა ახალი თეატრის საპროტესტო მანიფესტის წარდგენისას მსახიობმა ნანკა კალატოზიშვილმა.

ახალმა თეატრმა საპროტესტო მანიფესტი თბილისში, ახალი თეატრის წინ მოწყობილ სცენაზე 23 იანვარს წარმოადგინა, სადაც მსახიობებმა ქვეყანაში მიმდინარე მოვლენები გააპროტესტეს და უკანონოდ დაკავებულების, მათ შორის ახალი თეატრის მსახიობის, ანდრო ჭიჭინაძის გათავისუფლება მოითხოვეს. იმავე დღეს დააანონსა დათო დოიაშვილმა რეგიონებში გასვლა.

თბილისს გარეთ პირველი გასვლა 1-ელ თებერვალს ბათუმში დაიგეგმა, მეორე — 2 იანვარს სამეგრელოში, 8 თებერვალს — ქუთაისში, 9 თებერვალს — ოზურგეთში,