ფსიქოსოციალური და სამედიცინო რეაბილიტაციის ცენტრი (GCRT) მხარდაჭერას უცხადებს მაია ცირამუასა და ქეთი ფილაურს, რომლებსაც შსს-მ სამართალდარღვევის ოქმი შეუდგინა 26 იანვარს ქუთაისში, სააპელაციო სასამართლოს მოსამართლე მალხაზ ოქროპირიძის სახლთან გამართული აქციისთვის, რომლითაც მზია ამაღლობელის უკანონო პატიმრობას აპროტესტებდნენ.

შსს-მ ადმინისტრაციული სამართალდარღვევის ოქმი აღნიშნული საპროტესტო აქციის სულ 9 მონაწილეს შეუდგინა, მათ შორის, ჟურნალისტებს — გელა მთივლიშვილს, ხვიჩა ვაშაყმაძესა და ეკა კუხალაშვილს, მუსიკოს ნინო ქათამაძეს, მასწავლებელ ვლადიმერ აფხაზავას, აქტივისტ ირინა ზარანდიასა და ლანჩხუთის საკრებულოს წევრ გივი ცინცაძეს და ფსიქოლოგებს — მაია ცირამუასა და ქეთი ფილაურს.

GCRT გავრცელებულ განცხადებაში წერს, რომ მაია ცირამუა და ქეთი ფილაური თანამედროვე ქართული ფსიქიკური ჯანმრთელობის სფეროს გამორჩეული ფიგურები არიან და სწორედ ამიტომ 10 იანვარს მათ მხარდამჭერ, ფსიქოლოგების აქციას აანონსებენ.

"მაია ცირამუა და ქეთი ფილაური თანამედროვე ქართული ფსიქიკური ჯანმრთელობის სფეროს ორი გამორჩეული ფიგურაა.

მაია GCRT-ს თანამშრომელია 2005 წლიდან. ის წლების განმავლობაში მუშაობდა არასრულწლოვან მსჯავრდადებულებთან, დღემდე მუშაობს სექსუალური ძალადობის მსხვერპლ ბავშვებთან და ქალებთან, ომით დაზარალებულ ადამიანებთან, წამების მსხვერპლებთან.

ქეთი ფილაური არის საქართველოს ფსიქოტრავმის საზოგადოების გამგეობის წევრი, საქართველოს EMDR საზოგადოების პრეზიდენტი, საქართველოს სხეულზე ორიენტირებული საზოგადოების გამგეობის წევრი. ილიას უნივერსიტეტის ფსიქიკური ჯანმრთელობის სამაგისტრო პროგრამის მოწვეული ლექტორი.

მაიას და ქეთის დიდი წვლილი მიუძღვით საქართველოში არასრულწლოვანთა მართლმსაჯულების და ბავშვთა კეთილდღეობის სფეროების განვითარებაში.

ისინი ძალიან ბევრი ადამიანის პროფესიული საყრდენი და იმედია. ბევრი ახალგაზრდა ადამიანის როლური მოდელი.

10 თებერვალს, 12 საათზე, თბილისში, თსუ-ს პირველ კორპუსთან ფსიქოლოგების მხარდამჭერი აქცია იმართება", — ნათქვამია გავრცელებულ განცხადებაში.