აშშ-ის განვითარების საერთაშორისო სააგენტოს (USAID) ყოფილმა ხელმძღვანელმა, სამანტა პაუერმა The New York Times-ისთვის მიცემულ ინტერვიუში ისაუბრა დონალდ ტრამპის ადმინისტრაციის გადაწყვეტილებაზე USAID-ის სახელმწიფო დეპარტამენტისთვის მიერთებასთან დაკავშირებით. სამანტა პაუერის შეფასებით, USAID-ის მოკვლა მსოფლიოში ავტოკრატიების გამარჯვებას ნიშნავს.

"ჩვენ მომსწრენი ვართ ერთ-ერთ ყველაზე უარესი და ძვირადღირებული პოლიტიკური შეცდომისა აშშ-ის ისტორიაში. დონალდ ტრამპის მეორე ვადის პირველსავე სამ კვირაში მან, ილონ მასკმა და სახელმწიფო მდივანმა მარკო რუბიომ შეაჩერეს აშშ-ის საერთაშორისო განვითარების სააგენტოს დახმარების პროგრამები მთელ მსოფლიოში. ამით მათ საფრთხე შეუქმნეს მილიონობით სიცოცხლეს, ათასობით ამერიკულ სამუშაო ადგილს და მილიარდობით დოლარის ინვესტიციებს ამერიკულ მცირე ბიზნესებსა და ფერმებში და ამავე დროს, სერიოზულად გამოუთხარეს ძირი ჩვენს ეროვნულ უსაფრთხოებასა და გლობალურ გავლენას — ეს ყველაფერი მაშინ, როცა ავტორიტარები და ექსტრემისტები თავიანთ წარმატებას ზეიმობენ.

მე შოკირებული ვარ ჩვენი მთავრობის მხრიდან თავდასხმით USAID-ის პროგრამებისა და მათზე მომუშავე საჯარო მოხელეების წინააღმდეგ, მაგრამ სააგენტოს ოთხწლიანი მართვის შემდეგ, არ მიკვირს, რომ ამ თავდასხმებს მოსკოვი და პეკინი მიესალმებიან. მათ ესმით, რისი დამალვა სურთ ამერიკელი ხალხისგან მათ, ვინც სააგენტოს დაშლას ცდილობს: USAID გახდა ამერიკის სუპერძალა მსოფლიოში, სადაც არსებობს საფრთხეები, რომლებიც საზღვრებს კვეთს და მზარდი სტრატეგიული კონკურენცია.

USAID-ისგან მომავალი დახმარება მრავალი ფორმისაა და აშშ-ის მთავრობის ყოველწლიური ხარჯვის 1%-ზე ნაკლებს შეადგენს. როგორც ყველა სამთავრობო სააგენტო, ისიც შეიძლება უფრო ეფექტიანი იყოს და ჩემი ვადის განმავლობაში მე მხოლოდ ამას ვცდილობდი. მსოფლიოს მოსახლეობის დიდი ნაწილისთვის USAID-ის შრომა და ინვესტიციები წარმოადგენს აშშ-სთან კონტაქტის ძირითად წყაროს", — განაცხადა სამანტა პაუერმა.