ფედერალურმა მოსამართლე კარლ ნიკოლსმა 7 თებერვალს დროებით შეაჩერა დონალდ ტრამპისა და მისი მილიარდერი მოკავშირის, ილონ მასკის გადაწყვეტილება აშშ-ის საერთაშორისო განვითარების სააგენტოს (USAID) ათასობით თანამშრომლის გათავისუფლების შესახებ.

თავად ტრამპის დანიშნული კარლ ნიკოლსის გადაწყვეტილებით, დაიბლოკა ის განკარგულებაც, რომელიც ათასობით საზღვარგარეთ მივლენილ თანამშრომელს მხოლოდ 30 დღეს აძლევდა მთავრობის ხარჯზე აშშ-ში ოჯახების დასაბრუნებლად.

მოსამართლე ნიკოლსის დასაბუთებით, ორივე ქმედება USAID-ის თანამშრომლებსა და მათ ოჯახებს უსაფუძვლო და უსამართლო რისკსა და ფინანსურ ტვირთს შეუქმნიდა.

ნიკოლსმა გამოყო საზღვარგარეთ მომუშავე თანამშრომლების განცხადებებიც, რომლების თქმითაც, ტრამპის ადმინისტრაციამ სააგენტოს მოულოდნელი დახურვის პირობებში, მათ ნაწილს შეუზღუდა წვდომა ელ.ფოსტებსა და კომუნიკაციის სხვა სისტემებზე, რომლებიც აშშ-ის მთავრობასთან დასაკავშირებლად სჭირდებოდათ ჯანმრთელობის ან უსაფრთხოების პრობლემების შემთხვევაში.

"ადმინისტრაციული შვებულება სირიაში არ არის იგივე, რაც ადმინისტრაციული შვებულება ბეთესდაში [ქალაქი მერილენდში]", — განაცხადა მოსამართლე ნიკოლსმა.