"ჩნდება საფუძვლიანი ეჭვი, რომ ადგილი აქვს დიპლომატიური ფოსტისა და დიპლომატიური იმუნიტეტის გამოყენებას პირადი მიზნებისთვის. შესაძლოა, ფოსტა გამოიყენება სანქციების თავის არიდებისა და შავი ფულის გადასატანადაც," — ასე გამოეხმაურა პარტია გახარია საქართველოსთვის ფეისბუქ-პოსტში იაპონური გამოცემა, Bunshun-ის სტატიას, იაპონიაში საქართველოს ელჩის, თეიმურაზ ლეჟავას და უტა ივანიშვილის საიდუმლო შეხვედრაზე.

"ჟურნალისტური გამოძიებიდან ჩნდება საფუძვლიანი ეჭვი, რომ საქართველოს დიპლომატიური სამსახური და დიპლომატები ჩართულები არიან ივანიშვილისა და მისი ოჯახის პირადი ინტერესების მსახურებაში.

ასევე ჩნდება საფუძვლიანი ეჭვი, რომ ადგილი აქვს დიპლომატიური ფოსტისა და დიპლომატიური იმუნიტეტის გამოყენებას პირადი მიზნებისთვის. შესაძლოა, ფოსტა გამოიყენება სანქციების თავის არიდებისა და შავი ფულის გადასატანადაც.
ეს არამარტო საქართველოს კანონმდებლობის, არამედ საერთაშორისო კონვენციების უხეში დარღვევაა და დიდი დიპლომატიური სკანდალიც შეიძლება მოჰყვეს," – ნათქვამია გახარია საქართველოსთვის ფეისბუქ-პოსტში.

შეგახსენებთ, იაპონური გამოცემა, Bunshun ოცნების საპატიო თავმჯდომარის, ბიძინა ივანიშვილის უფროსი შვილის, უტა ივანიშვილის და იაპონიაში საქართველოს ელჩის, თეიმურაზ ლეჟავას საიდუმლო შეხვედრის დეტალებზე წერს. სტატიის თარგმანს სტუდია მონიტორი ავრცელებს.

Bunshun-ის ცნობით, ელჩმა უტა ივანიშვილს დიდი შავი ჩანთა გადასცა და ქართულად უთხრა:

"აქ არ გახსნა. იმედია, ეს დაგეხმარება".