შინაგან საქმეთა სამინისტრო ტაბულასა და აპრილის ჟურნალისტებს სამსახურეობრივი მოვალეობის შესრულებისას გზის გადაკეტვას ედავება.

ტაბულას ცნობით, მათ რეპორტიორს, ნიკოლოზ ჭირაქაძეს გუშინ შინაგან საქმეთა სამინისტრომ სატელეფონო ზარით აცნობა, რომ 17 იანვარს მან რუსთაველზე გზა გადაკეტა და ამის გამო, სასამართლოს წინაშე უნდა წარსდგეს. მედიასააგენტოს განცხადებით, ნიკოლოზ ჭირაქაძე 17 იანვარს რუსთაველის გამზირზე ასრულებდა პროფესიულ მოვალეობას და ეკიდა პრესის ბარათი.

რაც შეეხება მედია აპრილის რეპორტიორს, ვახო ქარელს, მას შსს 26 იანვარს გზის გადაკეტვას ედავება.

"26 იანვარს ვახო ქარელი თავდაპირველად პოლიციური რეჟიმის წინააღმდეგ მარშზე იმყოფებოდა, რომელიც დიდუბის მეტროსადგურიდან დაიწყო. მოგვიანებით მან გადაინაცვლა დამკვირვებლების მარშზე, შემდეგ კი რუსთაველის გამზირზე მიმდინარე აქციაზე. გარდა იმისა, რომ ასრულებდა თავის მოვალეობას, ვახო ქარელს თან ჰქონდა პრესის ბარათი, რომელიც ადასტურებს, რომ ის მედია აპრილის ფოტორეპორტიორია", — წერს აპრილი.

მოგვიანებით, ვახო ქარელს შსს-დან დაურეკეს და უთხრეს, რომ წარმოადგინოს ჟურნალისტობის დამადასტურებელი ცნობა და დანარჩენს შემდეგ მოახსენებენ.