5 თებერვალს ევროპარლამენტარების ნაწილმა ევროპარლამენტის შენობაში მზია ამაღლობელის მხარდამჭერი აქცია გამართა.

აქციის ორგანიზატორი ევროპარლამენტარი პეტრას აუსტრევიჩუსი იყო. ევროპარლამენტარებს საქართველოს დროშა და მზია ამაღლობლის ფოტოები ეჭირათ წარწერით "თავისუფლება მზია ამაღლობელს".

ინფორმაციისთვის, ბათუმელებისა და ნეტგაზეთის დამფუძნებელი, მზია ამაღლობელი, 25-ე დღეა შიმშილობს. მას პროკურატურა სისხლის სამართლის კოდექსის 353-ე მუხლის დარღვევას ედავება, რაც პოლიციელზე თავდასხმას გულისხმობს და სასჯელის სახით 4-დან 7 წლამდე პატიმრობას ითვალისწინებს.

მზია ამაღლობელი 11 იანვარს 2-ჯერ დააკავეს — თავდაპირველად, ჟურნალისტი შენობაზე სტიკერის მიკვრის გამო დააპატიმრეს, რამდენიმე საათში კი ხელწერილით გამოუშვეს. საიას ინფორმაციით, პოლიციის განყოფილებაში მზია ამაღლობელი დამამცირებელი მოპყრობის მსხვერპლი გახდა.