წარმოიდგინეთ, რომ ოთახში იმყოფებით მსოფლიოს უძლიერესი რელიგიური ინსტიტუციის, კათოლიკური ეკლესიის ყველაზე გავლენიან და ძლევამოსილ ლიდერებთან ერთად. ნებისმიერი მათგანი შესაძლოა გახდეს მომდევნო პაპი. სწორედ ესაა ახალი პოლიტიკური ტრილერის, Conclave-ს სიუჟეტი, რომელიც მაყურებელს ვატიკანის გასაიდუმლოებულ რიტუალს, პაპის არჩევის პროცესს მთელი სიცხადით, თანმხლები დრამითა და ინტრიგით გვიჩვენებს.

ფილმი რობერტ ჰარისის ამავე სახელწოდების მქონე ბესტსელერის მიხედვითაა გადაღებული და მთავარ ფოკუსში კარდინალ ლომელის, კარდინალთა კოლეჯის რექტორს, აქცევს. პაპის უცაბედი გარდაცვალების შემდეგ ახალი პაპის არჩევის პროცესის ზედამხედველობა სწორედ ლომელის ეკისრება. ვატიკანის წმინდა დერეფნები ფილმში რწმენის, ამბიციისა და ფარული გეგმების ბრძოლის ველად გარდაიქმნება, როცა მსოფლიოს ირგვლივ მცხოვრები 118 კარდინალი ხმის მისაცემად იკრიბება. გულწრფელი და წმინდა ვალდებულების შესრულებით დაწყებული პროცესი მალევე იქცევა ძალათა ჭიდილად — თითოეული კანდიდატი იწყებს საიდუმლოების პირადი ინტერესებისათვის გამოყენებას, რომლებითაც ეკლესიის საფუძველს გამოცლა ემუქრება.

დაძაბული მოვლენების ფონზე ყალიბდება და ინგრევა კავშირები, უძველეს კედლებს სკანდალური ჭორების ექო აყრუებს და ისედაც დაძაბულ სიტუაციას მოულოდნელი სტუმრის გამოჩენა სრულ კრიზისად აქცევს. კარდინალმა ლომელიმ, რომელსაც ტრადიციებისადმი ერთგულებასა და მის თვალწინ გამჟღავნებულ შოკისმომგვრელ სიმართლეს შორის მძიმე არჩევანის გაკეთება უწევს, ღალატით აღსავსე პოლიტიკურ ატმოსფეროში გზა უნდა გაიკვლიოს, რათა უზრუნველყოს ეკლესიის მთლიანობის შენარჩუნება.

ფილმში, რომელშიც ერთ-ერთ როლს ქართველი მსახიობი, მერაბ ნინიძე ასრულებს, მთავარი პერსონაჟის როლში რეიფ ფაინზი გვხვდება. Conclave-ს მსახიობთა სიაში გვხვდებიან სტენლი ტუჩი, იზაბელა როსელინი და ჰოლივუდის სხვა ცნობილი არტისტები. ედვარდ ბერგერის რეჟისურით გადაღებული ფილმის დამატყვევებელი კინემატოგრაფია ვატიკანის გრანდიოზულობასა და დიდებულებას სრულად აფიქსირებს და ოსტატურად გვიჩვენებს მის კედლებში განვითარებული მოვლენების დრამატულობას, მისტიკურობასა და პოლიტიკურ ინტრიგას, რომელიც აქ საუკუნეების განმავლობაში იყო მთავარი გავლენა. ფილმში ლიდერობის სირთულე, პირადი ამბიციებისა და მორალური პასუხისმგებლობების სიმძიმე და ძალაუფლების მოსაპოვებლად საჭირო მსხვერპლის გაღების მოტივები მაყურებელს აღფრთოვანებულს ტოვებს.

ვინ იქნება შემდეგი პაპი? რეფორმატორი, კონსერვატორი თუ ის, ვინც ყველაზე მეტ საიდუმლოს ინახავს? Conclave-ს მთელი ქრონომეტრაჟის განმავლობაში გარანტირებული გაქვთ ფილმის თვალმოუშორებლად ცქერა და აღშფოთებისა და გაოცების დაუსრულებელ კასკადაში მოგზაურობა.

დახვეწილი ტრილერებისა და ისტორიული დრამის მოყვარული მაყურებლისთვის ეს ფილმი აუცილებლად სანახავია — Conclave კიდევ ერთხელ დაგარწმუნებთ, რომ მთავარი ბრძოლა არა ველზე, არამედ დახურულ კარებს მიღმა მიმდინარეობს.

Conclave-მა წლევანდელ ოსკარების დაჯილდოების ცერემონიაზე 8 ნომინაცია მოიპოვა. ფილმი წარდგენილია საუკეთესო ფილმის, საუკეთესო მთავარი როლის შემსრულებელი კაცი მსახიობის, საუკეთესო მეორეხარისხოვანი როლის შემსრულებელი ქალი მსახიობის, საუკეთესო ორიგინალური მუსიკის, საუკეთესო ადაპტირებული სცენარის, საუკეთესო მონტაჟის, საუკეთესო დიზაინისა და კოსტიუმების დიზაინის ნომინაციებში.