მთიანი ყარაბაღის არმიის ყოფილი მეთაური, ჯალალ ჰარუთინიანი, დამნაშავედ ცნეს საომარი მდგომარეობისას სამხედრო სამსახურის მიმართ გულგრილ დამოკიდებულებაში, რასაც 20 ჯარისკაცის სიკვდილი მოჰყვა მთიანი ყარაბაღის მეორე ომში.

ჰარუთინიანის სასამართლო 15 იანვარს გაიმართა და მას ციხეში 10 წელს გატარება მოუწევს.

დაზარალებულთა წარმომადგენელი ლიპარიტ სიმონიანის ცნობით, ჰარუთინიანი დამნაშავედ იქნა ცნობილი 2020 წლის 12 ოქტომბერს 20 ჯარისკაცის სიკვდილში ცორის სამხედრო ნაწილში.

სიმონიანმა რადიო თავისუფლებას განუცხადა, რომ ამ დღეს, საბრძოლო პოზიციებზე განლაგებულმა დივიზიამ შეამჩნია საპირისპირო მიმართულებიდან მომავალი ჯარისკაცთა ჯგუფი. დივიზიამ მიიღო დასტური, რომ მომავალი ჯგუფი სომეხი სამხედროებისგან შედგებოდა.

"[ჰარუთინიანმა] პირადად განაცხადა, რომ ისინი 100%-ით ჩვენები იყვნენ — ეს მან ორჯერ თქვა. შედეგად, [აზერბაიჯანელები] მოვიდნენ და ის ბავშვები [ჯარისკაცები] ალყაში მოაქციეს. ბავშვებმა წინააღმდეგობა გაუწიეს, როგორც შეეძლოთ, მაგრამ ძალთა უთანასწორობის გამო, ოცი მათგანი დაიღუპა", — განაცხადა სიმონიანმა.

ჰარუთინიანის ადვოკატმა, არსენ სარდარიანმა, განაცხადა, რომ გადაწყვეტილება გასაჩივრდება და ძალიან მოულოდნელია. ჰარუთინიანი თავს დამნაშავედ არ ცნობს. ადვოკატის თქმით, ვითარება სიმონიანის მონათხრობისგან განსხვავებული იყო.

"პირველ რიგში, ფრაზა ამ ფორმატში არ თქმულა. მეორე, საკითხი არაერთი პერსპექტივიდან უნდა განვიხილოთ — ვინ თქვა, როგორ, სად და რა მოხდა. ამის შესახებ ბევრი მტკიცებულება არსებობს", — განუცხადა სარდარიანმა რადიო თავისუფლებას.

ორი ბრალდება — მათ შორის ის, რომლის გამოც ის სამშაბათს გასამართლდა, ჰარუთინიანის წინააღმდეგ 2022 წლის სექტემბერში გამოჩნდა, რის შემდეგაც ის სომხეთის თავდაცვის სამინისტროს სამხედრო ზედამხედველობის სამსახურის ხელმძღვანელის პოსტიდან გადააყენეს და ქვეყნის დატოვება აუკრძალეს.

პოზიცია ჰარუთინიანმა 2021 წელს დაიკავა, მალევე მას შემდეგ, რაც დატოვა საავადყოფო — მთიანი ყარაბაღის მეორე ომის მიმდინარეობისას მისი ავტომობილი ააფეთქეს.

2023 წლის ნოემბერში სასამართლომ უდანაშაულოდ ცნო ჩავარდნილი კონტრშეტევის საქმეზე. ბრალდების მიხედვით, 2020 წლის 7 ოქტომბერს, მის მიერ გამოჩენილი გულგრილობის გამო სომხეთის არმიის კონტრშეტევა ჩავარდა და სომხურმა დანაყოფებმა მნიშვნელოვანი ადამიანური და სამხედრო ტექნიკის ზარალი განიცადეს.

ამავე ბრალდებით ჰარუთინიანამდე რამდენიმე დღით ადრე თანამდებობაზე მისი მემკვიდრე მიქაელ არზუმანიანი დააკავეს — მასაც ბრალად ყარაბაღის მეორე ომში გამოჩენილი "გულგრილობა" ედება.

იანვრის დასაწყისში დააკავეს ტიგრან ხაჩატრიანიც — სომხეთის შეიარაღებული ძალების გენშტაბის ყოფილი უფროსი. მას ორთვიანი წინასწარი პატიმრობა მიუსაჯეს — ბრალდება ამ შემთხვევაშიც ანალოგიურია: სამსახურეობრივი გულგრილობა ყარაბაღის მეორე ომის მიმდინარეობისას.

ხაჩატრიანს წარსულში ომში მსახურების გამო ეროვნული გმირის ტიტული აქვს მიღებული.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.