ტეხასის გუბერნატორის გრეგ ებოტის განცხადებით, ქარიშხლის შედეგების სალიკვიდაციოდ შტატს 180 მლრდ დოლარი დასჭირდება, ამის შესახებ მან Fox News-თან ინტერვიუში ისაუბრა.

ებოტის თქმით, ქარიშხალ ჰარვისგან მიყენებულმა ზარალმა, 2005 წელს, ნიუ ორლეანში კატრინას მიერ გამოწვეულ ზიანს გადააჭარბა. ქარიშხალი კატრინასგან მიყენებულმა ფინანსურმა ზარალმა, დაახლოებით, $120 მილიარდი შეადგინა.

ამავდროულად, აშშ-ს მთავრობამ კონგრესს $8 მილიარდის გამოყოფა სთხოვა. გუბერნატორის განცხადებით, ეს არის პირველადი სამუშაოებისთვის გამოყოფილი თანხა და წარმოადგენს ერთგვარ პირველად შენატანს სტიქიის შედეგების სალიკვიდაციო საქმეში. ორ სექტემბერს შტატის ადმინისტრაციის მიერ გავრცელებულ განცხადებაში ნათქვამი იყო, რომ ზარალი დაახლოებით, $125 მილიარდს შეადგენდა თუმცა, ეს თანხა მალევე შეიცვალა და $180 მილიარდს მიაღწია.

პრეზიდენტის ადმინისტრაციის მხრიდან უკვე გავრცელდა განცხადება, სადაც ნათქვამია, რომ სტიქიის შედეგების სალიკვიდაციო თანხის გამოსაყოფად საჭირო გახდება სახელმწიფო ვალის(სახელმწიფოს ხარჯვითი წილი) მაქსიმუმის გაზრდა თუმცა, ასეთი გადაწყვეტილების მიღება მხოლოდ კონგრესს შეუძლია.

ქარიშხალი ჰარვი ტეხასის შტატს ერთი კვირის წინ დაატყდა თავს, დაიღუპა 47 ადამიანი, ხოლო დაახლოებით 43 ათასი ადამიანი სახლის გარეშე დარჩა.