ცნობილი ამბავია, რომ რობერტ პატინსონს ბინდის საგა დიდად არ ეხატება გულზე. იმის მიუხედავად, რომ ინგლისელ მსახიობს საყოველთაო პოპულარობა სწორედ ედვარდ კალენის როლმა მოუტანა, პატინსონს სტეფანი მეიერის ვამპირული საგის მიმართ თავისი სიძულვილი არასდროს დაუმალავს. როცა წავიკითხე, ისეთი შთაბეჭდილება დამრჩა, რომ ეს წიგნი არც უნდა გამოცემულიყოო, აღნიშნა ერთ-ერთ ინტერვიუში. თუმცა, ამის მიუხედავად, ბინდის კრიტიკოსების რიგებში მსახიობი საკუთარ თავს მაინც ვერ ხედავს.

"როგორ მიყვარს, ხალხი რომ მოდის და მომახლის, ბინდმა ვამპირული ჟანრი მიწასთან გაასწორაო", — ირონიულად აღნიშნავს პატინსონი უახლეს ინტერვიუში, — "ნუთუ ისევ ამ უაზრობას უტრიალებთ? როგორ შეიძლება ლამის 20 წლის წინანდელი რამის გამო წუხდე?! დაუჯერებელია".

პატინსონს თურმე კიდევ იმის დაჯერება უჭირს, რომ ბინდის საგა პოპულარობას არ კარგავს.

"ეს ფილმები ხომ ძალიან ძველია. პირველი 2008 წელს გამოვიდა, ჯანდაბა!", — ამბობს მსახიობი.

ბინდი კი, არათუ ინარჩუნებს პოპულარობას, ახალი სიმაღლეების დასაპყრობადაც ემზადება. გასულ წელს შევიტყვეთ, რომ ნეტფლიქსი საგის ერთ-ერთი წიგნის, შუაღამის მზის, მიხედვით ანიმაციურ სერიალს გადაიღებს.

სტეფანი მეიერმა ბინდის საგის პირველი რომანი 2005 წელს გამოსცა. სერიის ოთხწიგნეული 37 ენაზე ითარგმნა და მსოფლიოში 100 მილიონზე მეტ ეგზემპლარად გაიყიდა, რამაც მწერალს $125-მილიონიანი შემოსავალი და თანამედროვეობის ერთ-ერთი ყველაზე აღიარებული ავტორის სახელი მოუტანა. საგის მიხედვით გადაღებულმა ხუთმა ფილმმა, სადაც მთავარი როლები რობერტ პატინსონმა, კრისტენ სტიუარტმა და ტეილორ ლოტნერმა შეასრულეს, მსოფლიოში ჯამურად $3,4 მილიარდზე მეტი გამოიმუშავა.

2020 წელს მეიერმა ასევე განაცხადა, რომ ბინდის სამყაროსთან დაკავშირებული კიდევ ორი წიგნის დაწერას აპირებს.

ასევე იხილეთ: