სათვალთვალო კამერის სადენებისთვის ცეცხლის წაკიდების ბრალდებით დაკავებული არჩილ მუსელიანი, მოსამართლე ლელა კალიჩენკომ პატიმრობაში დატოვა. სხდომა დღეს, 22 იანვარს თბილისის საქალაქო სასამართლოში გაიმართა. ამასთან, კალიჩენკომ არ დააკმაყოფილა დაცვის მხარის შუამდგომლობა, რომელიც პატიმრობის გირაოთი შეცვლას ითხოვდა.

არჩილ მუსელიანს პარლამენტთან დამონტაჟებული ვიდეო-კამერების დაზიანებას, კერძოდ კი ცეცხლის წაკიდებას ედავებიან. იგი თავდაპირველად, პროევროპული აქციების პერიოდში, ადმინისტრაციული წესით დააკავეს.

მუსელიანი ბრალს არ აღიარებს და იგი იზოლატორში "შანტაჟის, მუქარის და დაშინების მსხვერპლი“ გახდა, თან დასძენს რომ სამართალდამცავებმა იგი მოტყუებით დააკავეს და დაკითხვის ოქმზეც ხელი მოტყუებით მოაწერინეს.

"დაკავების, დაკითხვის პროცესი იყო უკანონო. დაკავების პროცესი განხორციელდა მოტყუებით, დაკავების დრო იყო სხვა და ოქმში აღნიშნული დრო კი, სხვა. [ასევე ადგილი ჰქონდა] დაკითხვის ოქმებში მოტყუებით ხელმოწერას. იყო ფსიქოლოგიური ზეწოლა, შანტაჟი მუქარა ზეწოლა და ა.შ.

არ ვაპირებ არანაირ თანამშრომლობას რეჟიმის პროკურატურასთან, არც დათმობას. ბრალდებას, რაც წარმიდგინეს არ ვაღიარებ. საპროცესო შეთანხმებაზე ხომ საუბარი ზედმეტია", — განაცხადა მუსელიანცმა სასამართლო სხდომაზე.

როგორც ადვოკატი დიმიტრი ვარდიაშვილი აღნიშნავს, სამართალდამცავებმა მისი დაცვის ქვეშ მყოფი დაკავებისას სცემეს. ადვოკატმა სხდომაზე, ბრალდების მხარის მხრიდან წარმოდგენილი ყველა მტკიცებულების დაუშვებლად ცნობა მოითხოვა, რადგან მისი თქმით, ისინი საპროცესო ნორმების დარღვევით არის მოპოვებული.

ვარდიაშვილის თქმით, მუსელიანცი დაკავების შემდეგ 5 დღე ადვოკატის გარეშე იყო.

"არჩილ მუსელიანცს ედავებიან ცეცხლის წაკიდებას პარლამენტთან დამონტაჟებული კამერაზე.

ჩემი დაცვის ქვეშ მყოფი ბრალდებას არ აღიარებს. მასზე იყო, როგორც ფიზიკური, ისე ფსიქოლოგიური ზეწოლა. მას სთავაზობდნენ გარიგებას, თუ დაადებდა ხელს რომელიმე პოლიტიკოსს, ვინც უხდიდა თანხას, ასეთ შემთხვევაში შეიძლებოდა, რომ გაეშვათ. აჩვენებდნენ თითქმის ყველა პოლიტიკოსის სურათებს, ესენი არიან არა მთავრობის წარმომადგენლები, არამედ ოპოზიციის წარმომადგენლები. თქვა, რომ ტელეფონში მაჩვენებდნენ სურათებს და შენ დაგვიდე ხელი, ვინ გიხდის თანხასო", — განაცხადა დიმიტრი ვარდიაშვილმა.

რაც შეეხება სამართალდამცველების მხრიდან ფოტოების ჩვენების ნაწილს, როგორც სხდომაზე პროკურორმა აღნიშნა, სპეციალურმა საგამოძიებო სამსახურმა მოკვლევა დაიწყო. რაც შეეხება დაცვის მხარის მოთხოვნას, რომ ბრალდების მხარის ყველა მტკიცებულება დაუშვებლად იყოს ცნობილი, პროკურორის თქმით, აღნიშნული მოთხოვნა დაუსაბუთებელია.

ცნობისთვის, არჩილ მუსელიანცი 2024 წლის 30 ნოემბერს, თავდაპირველად დააკავეს ადმინისტრაციული მუხლით, თუმცა შემდეგში სისხლის სამართლით ჩადენილი დანაშაულით, 187-ე მუხლის მეორე ნაწილით გადაუკვალიფიცირდა, რაც გულისხმობს სხვისი ნივთის განზრახ დაზიანებას და განადგურებას.

იმ შემთხვევაში, თუ მუსელიანცს ბრალი დაუმტკიცდა 3-დან 6 წლამდე თავისუფლების აღკვეთა ემუქრება.