ჟურნალისტები სპეციალური საგამოძიებო სამსახურის შენობასთან აქციას მართავენ და უწყების უფროსთან, კოკა კაციტაძესთან შეხვედრას ითხოვენ.

მედიის წარმომადგენლები ითხოვენ, რომ ნეტგაზეთისა და ბათუმელების თანადამფუძნებლისა და რედაქტორის, მზია ამაღლობელის საქმე დაუყოვნებლივ იქნეს გამოძიებული და მას მიენიჭოს დაზარალებულის სტატუსი, ასევე — მზია ამაღლობელის მიმართ არაადამიანური და დამამცირებელი მოპყრობის გამო პასუხისმგებლობაში მიეცეს და სამსახურებრივი უფლებამოსილება შეუჩერდეს ბათუმის პოლიციის უფროსს, ირაკლი დგებუაძეს.

ჟურნალისტების თქმით, აუცილებელია, ბათუმის სამმართველოდან ამოღებული იქნას ვიდეო მტკიცებულებები, რომელიც მზია ამაღლობელის საქმეს დაერთვება.

"რასაც ვხედავთ, სპეციალური საგამოძიებო სამსახური დაკავებულია ორ-სამ გვერდიანი, დემაგოგიით სავსე, პრესრელიზების გამოქვეყნებით და მთელ რიგ პროცესუალურ ნორმებს გვიხსნიან. რა თქმა უნდა, გამოძიება უნდა იყოს სრულყოფილი და ობიექტური, ამას თავისი პროცედურები სჭირდება, მაგრამ შეუძლებელია, სილის გაწვნისთვის აკავებდნენ ადამიანს რამდენიმე წუთში, მესამე დღეს უსჯიდნენ პატიმრობას — 4-დან 7-წლამდე პატიმრობა ემუქრებოდეს, ამ დროს ბათუმის მილიციის უფროსი, რომელმაც მზიას [ამაღლობელი] მიმართ დანაშაული ჩაიდინა, არაადამიანურად მოეპყრო, შეაფურთხა სახეში და მისკენ ფიზიკური შეურაცხყოფის მისაყენებლად იწევდა, ისევ თავის თანამდებობაზე რჩებოდეს. ვითხოვთ, რომ ეს დანაშაულები დაუყოვნებლივ იქნას გამოძიებული. ამ დანაშაულების მტკიცებულებები ბათუმის მილიციის უფროსმა რომ არ გაანადგუროს, ვითხოვთ, რომ მას შეუჩერდეს სამსახურებრივი უფლებამოსილება, რათა მოწმეებზე ზეგავლენაც არ მოახდინოს. ყველაზე მთავარი მოთხოვნაა ის, რომ მზია უკანონო პატიმარია და საიას ოფისში გამართულ პრესკონფერენციაზე მტკიცებულებების კასკადით დადასტურდა მზიას უკანონო პოლიტიკური პატიმრობა, ამიტომ, კეთილი ინებონ და გაათავისუფლონ ის", — განაცხადა ჟურნალისტმა გელა მთივლიშვილმა.

მანამდე, ჟურნალისტებმა, ბათუმელებისა და ნეტგაზეთის დამფუძნებლის, მზია ამაღლობელის გათავისუფლების მოთხოვნით, აქცია მთავრობის კანცელარიასთან გამართეს, სადაც მთავრობის სხდომა მიმდინარეობდა.