ადამიანის უფლებათა დაცვისა და სამოქალაქო ინტეგრაციის კომიტეტის 2017-2018 წლების სამოქმედო გეგმაში 17 მაისის, ჰომოფობიასთან და ტრანსფობიასთან ბრძოლის საერთაშორისო დღის აღნიშვნაა გაწერილი. ამის შესახებ ონლაინ გამოცემა ლიბერალი წერს.

ფოტო: ლიბერალი

სამოქმედო გეგმის დოკუმენტის ერთ-ერთ ქვეთავში - მოქალაქეების ინფორმირებულობა, საჯარო ღონისძიებები და გასვლითი შეხვედრები, ვკითხულობთ: "ადამიანის უფლებებთან დაკავშირებული დღეების აღნიშვნა ხელს შეუწყობს სოლიდარობის გამოხატვას უფლებადარღვეული პირების მიმართ და საზოგადოების ცნობიერების ამაღლებას ამ საკითხთან დაკავშირებით. ამ პროცესში მიზანშეწონილია კომიტეტმა ითანამშრომლოს, როგორც დონორ ორგანიზაციებთან, ისე სამოქალაქო საზოგადოების ორგანიზაციებთან, რათა ერთობლივად მოხდეს საჯარო ღონისძიებების დაგეგმვა".

პირველ სექტემბერს, საქართველოს პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის 2017-2020 წლების სტრატეგიისა და 2017-2018 წლების სამოქმედო გეგმის პრეზენტაცია გაიმართა.

სტრატეგიული დოკუმენტების პრეზენტაციას ესწრებოდნენ საკანონმდებლო, აღმასრულებელი და სასამართლო ხელისუფლების, საქართველოში აკრედიტებული დიპლომატიური კორპუსის, საერთაშორისო ორგანიზაციების, არასამთავრობო სექტორის და საზოგადოების წარმომადგენლები.

ღონისძიება ევროკავშირისა და გაეროს განვითარების პროგრამის ერთობლივი პროექტის ადამიანის უფლებები ყველასთვის მხარდაჭერით შედგა.