დონალდ ტრამპის ინაუგურაციამდე 3 დღით ადრე მოსკოვი და თეირანი ახლო ურთიერთობებს სამოკავშირეო ხელშეკრულებით დაამტკიცებენ და ხელს სტრატეგიული პარტნიორობის 20-წლიან ხელშეკრულებას მოაწერენ.

ირანი რუსეთს აქტიურად ეხმარება უკრაინაში მიმდინარე აგრესიის გაგრძელებაში და მას "შაჰედის" ტიპის დრონებით ამარაგებს — დასავლური სანქციების მიუხედავად, ორმა ქვეყანამ ვაჭრობა გაზარდა.

კრემლის განცხადებით, ხელშეკრულება გააძლიერებს თეირანისა და მოსკოვის სამხედრო-პოლიტიკურ და ეკონომიკურ ურთიერთობებს.

ოფიციალურ თეირანს ხელშეკრულებაზე თითქმის არაფერი უთქვამს, თუმცა ურთიერთ თავდაცვის პუნქტი გამოირიცხა — ამგვარი შეთანხმება რუსეთს ჩრდილოეთ კორეასთან აქვს.

ორი მხარე ახალ ხელშეკრულებაზე წლების განმავლობაში მუშაობდა, აქამდე კი ირანისა და რუსეთის ურთიერთობებს 2001 წლის შეთანხმება განსაზღვრავდა, რომელიც პერიოდულად ახლდებოდა.

"ხეშეკრულება ბუნებით კონსტრუქციულია და ემსახურება რუსეთის, ირანისა და მსოფლიოს სხვადასხვა ნაწილში ჩვენი მეგობრების შესაძლებლობების ზრდას", — განაცხადა რუსეთის საგარეო საქმეთა მინისტრმა სერგეი ლავროვმა და აღნიშნა, რომ ფხენიანთან და ირანთან ხელშეკრულებები "არც ერთი ქვეყნის წინააღმდეგ არ არის მიმართული".

რუსული საინფორმაციო სააგენტო TASS-ის ცნობით, ხელშეკრულების ვადა 20 წელიწადს შეადგენს.