ლაშა გაბიტაშვილი, რომელზეც ქართული ოცნების წევრებმა, ირაკლი ზარქუამ და ვიქტორ სანიკიძემ ფიზიკურად იძალადეს, მიმართვას ავრცელებს. მიმართვაში, რომელიც გაბიტაშვილის მეუღლის Facebook გვერდის საშუალებით გამოქვეყნდა, ის ამბობს, რომ თავისუფალია და საქმეზე ისაუბრებს მას შემდეგ, რაც ის დასრულდება.

"მეგობრებო, თავისუფალი ვარ!

დიდი მადლობა ქართველ ხალხს ამ დღეებში გამოჩენილი მხარდაჭერისა და სიყვარულისთვის. არაბთა გაერთიანებული საამიროების სასამართლო სისტემა იყო სამართლიანი, ეფექტური და დამოუკიდებელი. მოხარული ვარ, რომ ეს ინციდენტი მოხდა თავისუფალ და პასუხისმგებლიან ქვეყანაში. მოუთმენალად ველი დაბრუნებას საქართველოში, რომელიც იმსახურებს თავისუფალ მოაზროვნეებსა და პასუხისმგებლიან ლიდერებს. განსაკუთრებული მადლობა ჩემს ოჯახს, ახალ და ძველ მეგობრებს და ოლგას, რომელიც ჩემი პირადი გმირია!

მოგვიანებით შევძლებ კითხვებზე პასუხს, როდესაც საქმე დაიხურება", — ვკითხულობთ პოსტში.

13 იანვარს ბიძინა ივანიშვილის დეპუტატები ვიქტორ სანიკიძე და ირაკლი ზარქუა მოქალაქე ლაშა გაბიტაშვილს აბუ დაბიში, ერთ-ერთ სასტუმროში ფიზიკურად გაუსწორდნენ. დაპირისპირების ვიდეოები გაბიტაშვილმა საკუთარ Facebook-გვერდზე გამოაქვეყნა.