საქართველოში დაგეგმილ საკონსტიტუციო რეფორმაზე 6 სექტემბერს სტრასბურგში დაგეგმილი შეხვედრა გაუქმებულია. ამის შესახებ ინფორმაცია ვენეციის კომისიის პრეზიდენტმა ჯანი ბუკიკიომ გაავრცელა. განცხადებაში ბუკიკიო სამწუხაროს უწოდებს იმ ფაქტს, რომ ქართულმა პარტიებმა ვერ შეძლეს, მოლაპარაკებების გზით, კონსესუსის მიღწევა საკონსტიტუციო რეფორმაზე.

"საქართველოს კონსტიტუციის გადასინჯვა მნიშვნელოვანი რეფორმაა, რომლის მიზანიც არსებული პოლიტიკური სისტემის ნამდვილ საპარლამენტო დემოკრატიად გარდაქმნაა.

მიმდინარე წლის ივნისში ვენეციის კომისიამ დადებითად შეაფასა საკონსტიტუციო ცვლილებების პროექტი, მათ შორის პარლამენტის ყველა წევრის პროპორციული სისტემით არჩევის დეკლარილებული ნაბიჯი. უფრო მეტიც, ჩვენ განსაკუთრებით მივესალმეთ საქართველოს პარლამენტთან აქტიურ თანამშრომლობასა და მის პირობას, არ მიიღოს რაიმე სახის ცვლილება, რომელიც უარყოფითად იქნება შეფასებული ვენეციის კომისიის მიერ.

შესაბამისად, სამწუხაროა როგორც პროპორციულ საარჩევნო სისტემაზე გადასვლის გადავადება 2024 წლისთვის, ისე - მოლაპარაკებების გზით პარტიების მიუღწეველი კონსესუსი საკონსტიტუციო ცვლილებების პროექტზე", – წერს ჯანი ბუკიკიო პირველ სექტემბერს გავრცელებულ წერილში.

ამავე განცხადებაში ვენეციის კომისიის პრეზიდენტი გამოთქვამს იმედს, რომ საქართველოს ხელისუფლება ვენეციის კომისიას უმოკლეს ვადაში გადაუგზავნის საკონსტიტუციო ცვლილებების საბოლოო ვარიანტს, რასთან დაკავშირებითაც, აღნიშნული ინსტიტუცია თავის დასკვნას დაახლოებით ერთ თვეში, ოქტომბერში გამოაქვეყნებს.

ბუკიკიო ასევე გამოთქვამს იმედს, რომ საქართველოს პარლამენტი ამ შენიშვნებს გაითვალისწინებს და საკონსტიტუციო რეფორმაზე მიაღწევს დიდი მასშტაბის კონსესუსს.