Warner Bros. 1954 წელს გამოცემული უილიამ გოლდინგის წიგნის, ბუზთა ბატონის, კიდევ ერთ ადაპტაციას გადაიღებს, თუმცა ამ ამბავში ყველაზე მთავარი ის არის, რომ ახლებურ ვერსიაში მთავარ როლებს ქალები შეასრულებენ.

კინოსტუდიაში ახალ ადაპტაციაზე დეივიდ სიგელი და სკოტ მაკგეჰენი იმუშავებენ.

ბუზთა ბატონი ავიაკატასტროფის შემდეგ, უკაცრიელ კუნძულზე მარტო დარჩენილ ბიჭებზე მოგვითხრობს, რომლებიც საკუთარი ტომის კანონებს ქმნიან. მწერალმა საკუთარ წიგნში არაერთი სტერეოტიპი დაანგრია და კუნძულზე მოხვედრილი სკოლის მოსწავლეების მაგალითზე შეულამაზებლად ასახა ადამიანის ქვეცნობიერში ცივილიზებულობის მიღმა მიმალული ურჩხული.

"ჩვენ წიგნის სიუჟტს მივყვებით, თუმცა გამომდინარე იქიდან, რომ შეცვლილი იქნება მთავარი პერსონაჟის სქესი, შეიცვლება მათი ემოციები და ქცევებიც. ეს ჩემთვისაც და მაყურებლისთვისაც ახალი გამოცდილება იქნება ნახოს ერთი და იგივე ისტორია, თუმცა ახლებურად.", ამბობს მაკგეჰენი.

აღსანიშნავია, რომ ბუზთა ბატონი პირველი შემთხვევა არ არის როდესაც სცენარში მთავარი პერსონაჟის სქესი იცვლება.

მაგალითად, ცოტა ხნის წინ BBC-იმ ოფიციალურად დაადასტურა, რომ Doctor Who-ს როლს ქალი მსახიობი ითამაშებდა, მოგვიანებით კი ეს გადაწყვეტილება კინოკომპანია Lionsgate-ისთვის შთაგონების წყარო გახდა და ოსკარ უაილდის რომანის დორიან გრეის პორტრეტის ახალი ვერსიის გადაღება გადაწყვიტეს, მთავარ, დორიან გრეის როლში კი ქალი მსახიობის დამტკიცებას გეგმავენ.