27 დეკემბერს, 17-წლიანი საჯარო სექტორში მუშაობის შემდეგ, თბილისის მერიიდან საჯარო მოხელე, საზოგადოებასთან ურთიერთობის დეპარტამენტის თანამშრომელი ლანა ქარდავაც გაათავისუფლეს.

ის სოციალურ ქსელში წერს, რომ განსხვავებული აზრის ღიად გამოხატვის, ევროპასთან ინტეგრაციის მხარდაჭერის, აქციებზე სიარულის, დემონსტრანტებზე ძალადობის ხმამაღლა დაგმობის გამო დაიწყეს ჩვენი სამსახურებიდან გამოშვება.

"2016-ში, მუშაობა დავიწყე თბილისის მერიის პრესსამსახურში, სადაც ვიმუშავე გათავისუფლებამდე, რომლის აშკარა მიზეზი გახდა ჩემი საჯარო განცხადებაზე ხელმოწერა, რომლითაც მასზე ხელმომწერები საქართველოს ევროპასთან ინტეგრაციის პროცესის შეწყვეტის გადაწყვეტილებას გავემიჯნეთ. ასე, მარტივად და დაუნდობლად, განსხვავებული აზრის ღიად გამოხატვის, ევროპასთან ინტეგრაციის მხარდაჭერის, აქციებზე სიარულის, დემონსტრანტებზე ძალადობის ხმამაღლა დაგმობის გამო დაიწყეს ჩვენი სამსახურებიდან გამოშვება. ზემოაღნიშნულ საჯარო განცხადებაზე ხელმომწერებს მალევე გვითხრეს, რომ "საბოტაჟის მცდელობა პასუხგაუცემელი არ დარჩებოდა", ჰოდა, პასუხი გაგვცეს. თუმცა ეს შიშს კი არ ზრდის, პირიქით, ბრძოლის ჟინსა და შემართებას აძლიერებს რეჟიმის წინააღმდეგ, რომელმაც ადამიანის უფლებები, დემოკრატია, ქვეყნის ევროატლანტიკური მისწრაფებები, კონსტიტუცია და ქვეყნის იმიჯი უკვე ფეხქვეშ გათელა და რაც ყველაზე მტკივნეულია, თავისუფალი, დემოკრატიული სამყაროსგან აბსოლუტურ თვითიზოლაციაში მოქცეული, ოკუპანტთან დამსგავსებისა და დამეგობრების გზას დაადგა!

…აქვე მინდა, ვთქვა — უსამართლობის განცდა ძალიან ცუდი რამ არის, მაგრამ შემართებას აძლიერებს. მე ახლა უდიდეს შემართებას და ოპტიმიზმს ვგრძნობ. ძალიან ძვირფასია ის მხარდაჭერა და სოლიდარობა, რასაც ვგრძნობ. ნაცნობების გარდა, სრულიად უცნობი ადამიანები მწერენ და თანადგომას მიცხადებენ. ყველას მადლობა სოლიდარობისთვის, თუნდაც ერთი "ლაიქისთვის".

მე კი ამიერიდან პარალელურ რეჟიმში ორ ფრონტზე გავაგრძელებ ბრძოლას - ჩემი უფლებების და სიმართლის დაცვის და ყველაზე საპატიო ფრონტზე -ჩვენი ქვეყნის თავისუფალი მომავლის დაცვის ფრონტზე.

მე ურყევად მჯერა გამარჯვების", — წერს ლანა ქარდავა სოციალურ ქსელში.