ეუთოს წარმომადგენელმა მედიის თავისუფლების საკითხებში გამოაქვეყნა შეფასება საქართველოს პრემიერ-მინისტრის გიორგი კვირიკაშვილის ინიციატივაზე, რომელიც ქვეყანაში მედია ომბუდსმენის ინსტიტუტის შექმნას უკავშირდება. როგორც აღნიშნულ დოკუმენტშია ნათქვამი, ეუთოს წარმომადგენლები საქართველოში შეხვდნენ ყველა დაინტერესებულ მხარეს, რასაც ეფუძნება მათი შეფასებები და რეკომენდაციები.

ამ რეკომენდაციის თანახმად, პრემიერ-მინისტრის ინიციატივა მედია ომბუდსმენის ინსტიტუტის ჩამოყალიბებაზე, საზოგადოების ფართო მონაწილეობითა და ჩართულობით უნდა იქნეს განხილული, მათ შორის, პროცესში უნდა მონაწილეობდნენ მედიის, არასამთავრობო სექტორის, აკადემიური სფეროსა და პოლიტიკური ძალების წარმომადგენლები. მედია ომბუდსმენის ინსტიტუტი საჭიროებს მაღალი ხარისხის ნდობასა და მიღებას საზოგადოების სხვადასხვა ჯგუფის მხრიდან.

ეუთოს განცხადებით, როდესაც არსებობს ომბუდსმენის ოფისი და ჟურნალისტური ეთიკის ქარტია, საჭიროა ფრთხილი და საფუძვლიანი ანალიზი იმისა, რამდენად შეუძლიათ ამ ინსტიტუციებს მედიის რეგულაციისა და თვითრეგულაციის სფეროში იმ გამოწვევებისთვის გამკლავება, რომლის მოსაგვარებლად გაჩნდა მედია ომბუდსმენის ინსტიტუტის შექმნის იდეა.

"მაშინ, როცა ეს ინსტიტუცია მხოლოდ ყველა აქტორის სრული ჩართულობით უნდა შეიქმნას, ექსპერტები ჯერჯერობით ვერ ხედავენ ამ ინსტიტუტის ჩამოყალიბების აუცილებლობას", - წერს ეუთო.

გიორგი კვირიკაშვილმა მედია ომბუდსმენის ინსტიტუტის შექმნის აუცილებლობაზე 2017 წლის მარტში ისაუბრა, რასაც მედიისა და არასამთავრობოების ნაწილის მხრიდან მყისიერად მიეცა უარყოფითი შეფასება. ინიციატივის მოწინააღმდეგეები მიიჩნევენ, რომ მედია ომბუდსმენის შექმნა ხელისუფლებას მედიაზე გავლენის გასაძლიერებლად სურს.