რუსეთის ჯანდაცვის სამინისტრომ ძლიერ ალკოჰოლურ სასმელზე აქციზის მომატების ინიციატივა წამოაყენა, წერს რია ნოვოსტი.

უწყებაში განაცხადეს, რომ ეს ალკოჰოლური სასმელის მოხმარების დონის დასაწევად ეფექტური საშუალებაა. ამ მომენტისთვის, რუსეთში ნახევარლიტრიანი არყის მინიმალური ფასი 205 რუბლია (8,36 ლარი), თუმცა რუსეთის ჯანდაცვის სამინისტრო მიიჩნევს, რომ ოპტიმალური ფასი 300 რუბლიდან (12,24 ლარი) უნდა იწყებოდეს:

"აქციზის მომატება შედარებით ეფექტური ხერხია ალკოჰოლური სასმელის მოხმარების დონის შესამცირებლად. ძლიერ სასმელზე, მათ შორის არაყზე, გადასახადმა ინფლაციაზე სწრაფად უნდა მოიმატოს, რათა მსგავსი სასმელი ნაკლებ მოთხოვნადი გახდეს, ვიდრე ნაკლებად ალკოჰოლური სასმელი".

სამინისტრომ 2018 წლისთვის ფასის მომატების შესახებ ფინანსთა სამინისტროს წინადადება უკვე გაუგზავნა, მაგრამ პასუხი ჯერ არ მიუღია.

მანამდე მრეწველობისა და ვაჭრობის ვაჭრობის სამინისტრომ ნახევარ ლიტრ არაყზე ოპტიმალურ ფასად 110-130 რუბლი (4,50-5,30 ლარი) დაასახელა და ამას დაბალანსებული სააქციზო პოლიტიკა უწოდა.