ჟურნალისტ მარიამ ნიკურაძის გამოკითხვა თბილისის საქალაქო სასამართლოში ცოტა ხნის წინ დასრულდა.

ის სასამართლოში დაბარებული იყო მოწმის სახით 225-ე (ჯგუფური ძალადობის ორგანიზება, ხელმძღვანელობა ან მასში მონაწილეობა) და 239-ე პრიმა მუხლებით (ძალადობრივი ქმედებისაკენ საჯაროდ მოწოდება) მიმდინარე გამოძიებაზე.

როგორც გამოკითხვის შემდეგ მარიამ ნიკურაძე ჟურნალისტებთან ამბობს, მისი გადაღებული ფოტოები და ვიდეოები არ უხსენებიათ, ზოგადი კითხვებით შემოიფარგლნენ.

"ძირითადად აინტერესებდათ სად ვიყავი, რას ვხედავდი, ალბათ როგორც ჟურნალისტი, მაგრამ ამას არ აკონკრეტებდნენ. ერთი უცნაური კითხვა ჰქონდათ, — რა გეცვა ხოლმეო. მისვამდნენ ზოგად კითხვებს — აქციაზე, როგორი სიტუაცია იყო, როგორ ვითარდებოდა მოვლენები, მე თუ დავინახე ვინმე კონკრეტული, ხალს თუ მოუწოდებდა ძალადობისკენ. ორგანიზატორი არ ჰყავს ამ აქციებს და ასეც ვუთხარი.

…ჩემი აზრით, გამოკითხული ადამიანებისგან უნდათ მიიღონ ინფორმაცია, რომ აქციის მონაწილეები პოლიციას ემორჩილებოდნენ თუ არა და იყო თუ არა ძალადობრივი აქცია", — განაცხადა მარიამ ნიკურაძემ.