ამერიკის შტატ ტეხასში მეორე დღეა სტიქია მძვინვარებს. 25 აგვისტოს, სანაპიროებს ქარიშხალმა ჰარვიმ გადაუარა, წვიმის შედეგად წარმოქმნილმა წყალდიდობამ კი 2 ადამიანის სიცოცხლე იმსხვერპლა. ინფორმაციის CNN ავრცელებს.

მაშველთა ჯგუფმა გვიან ღამით ქალაქ ჰიუსტონიდან სახლებში ჩარჩენილი ათასზე მეტი მოქალაქე გამოიყვანა. ოფიციალური პირების თქმით, მსხვერპლის რაოდენობა სავარაუდოდ გაიზრდება.

სააგენტოები სახლში დარჩენილ მოქალაქეებს აფრთხილებენ, რომ სახლები დამოუკიდებლად არ დატოვონ.

წვიმის შედეგად წარმოქმნილმა წყლის დონემ უკვე 60 სანტიმეტრს გადააჭარბა, თუმცა ის კვლავ გაიზრდება. ფლორიდამ და ნიუ-იორკმა ტეხასში მაშველები და ტექნიკა უკვე გაგზავნეს.

დაღუპულებიდან ერთი ქალია, რომელმაც წყლის დონის მომატების შემდეგ თავისი სატვირთო მანქანა დატოვა. ოფიციალური პირების თქმით, ის წყალმა წაიღო და დაიხრჩო.

ჰიუსტონის მერის თქმით, სტიქია ქალაქში 4 ან 5 დღე გაგრძელდება.