საგანგებო მდგომარეობაა გამოცხადებული აშშ-ს შტატ ტეხასში, სადაც უახლოეს საათებში ელოდებიან ქარიშხალს, რომელიც ამინდის ეროვნულმა სამსახურმა უკვე შეაფასა როგორც "კატასტროფული" და "მომაკვდინებელი".

ქარიშხალ ჰარვის უკვე მიანიჭეს მესამე კატეგორია. მაქსიმალური კატეგორია არის ხუთი, თუმცა, მესამე კატეგორიის ქარიშხალსაც დამანგრეველი ძალა აქვს, რადგან მისი სიჩქარე 190 კმ/სთ-ს აღწევს. გარდა ამისა, სანაპირო ზოლში მოსალოდნელია 1,8-დან 3,5 მეტრის სიმაღლის წყალდიდობა. ტეხასის მთავრობა ვარაუდობს, რომ ქარიშხლის ეპიცენტრი უახლოესი რამდენიმე კვირის, ან თვის განმავლობაში სრულიად გამოუსადეგარი იქნება საცხოვრებლად.

როგორც CNN აცხადებს, ქარიშხლის შესახებ გაფრთხილება მიიღო 1,5 მილიონმა ადამიანმა, 16 მილიონი კი ტროპიკული შტორმის არეალში ხვდება. ტეხასის რამდენიმე ქალაქი უკვე დაემსგავსა მოჩვენებების ქალაქს, რადგან მოსახლეობა მასობრივად გაიყვანეს შესაძლო ზიანის თავიდან ასაცილებლად. გარდა ამისა, ევაკუირებულაი საავადმყოფოები.

ქარიშხლის არეალში დახურულია ყველა საჯარო და კერძო დაწესებულება, მაღაზიებსა და სახლებს კარ-ფანჯრებზე ააკრეს დამცავი ფიცრები. დაცარიელებულია საკვები პროდუქტის მაღაზიები.

ძლიერი წვიმისა და ქარის სიჩქარის კომბინაციის გამო, დამანგრეველი შედეგებით, შესაძლოა, ჰარვი კატრინასაც კი გაუტოლდეს. ვარაუდობენ, რომ ჰარვი ტეხასის სანაპიროებს ადგილობრივი დროით 25 აგვისტოს საღამოს დაატყდება (თბილისის დროით გამთენიისას).

ბოლო 12 წელია აშშ-ს ასეთი დამანგრეველი ძალის ქარიშხალი არ დასტყდომია. არსებობს, მოლოდინი, რომ ეს იქნება დონალდ ტრამპის ადმინისტრაციისთვის პირველი სერიოზული ტესტი იმისა, თუ როგორ შეუძლია გაუმკლავდეს კრიზისულ ვითარებასა და ამ კრიზისით გამოწვეულ შედეგებს.