რადიო თავისუფლების ინფორმაციით, შინაგან საქმეთა სამინისტრომ, მომიტინგეების დასაშლელად გამოყვანილი ძალოვნების კვებაზე, გასული ერთი კვირის განმავლობაში ნახევარ მილიონ ლარზე მეტი დახარჯა.

სამინისტრო ლანჩის ნაკრებს ყიდულობს, რომელიც დაახლოებით 9 ლარამდე ღირს და 1 სენდვიჩის, 1 ცალი 55 გრამიანი შოკოლადის და 1 ცალი 0.5 ლიტრიანი პეპსისგან შედგება. 24 ნოემბრიდან 3 დეკემბრის ჩათვლით, სამინისტრომ გამარტივებული შესყიდვის გზით, ტენდერის გარეშე, დაჩქარებულად, დაახლოებით 67 ათასი ლანჩის ნაკრები შეიძინა რაშიც ჯამში 530 ათას ლარზე მეტი გადაიხადა.

რადიო თავისუფლების ცნობით, შინაგან საქმეთა სამინისტრო უკვე წლებია არღვევს შესყიდვების კანონმდებლობას და არ აქვეყნებს გამარტივებული შესყიდვის ხელშეკრულებებს, რაც შეუძლებელს ხდის დამატებითი ინფორმაციის მოძიებას. სამინისტრომ 2024 წლის ნოემბერში ტენდერითაც შეიძინა 22 ათასი ლანჩის ნაკრები 200 ათას ლარად.

ჯამში სახელმწიფო ბიუჯეტიდან 26 ოქტომბრის არჩევნების შემდეგ, საპროტესტო აქციების მართვისთვის ქუჩაში გამოყვანილი პოლიციელების კვებისთვის დაახლოებით 750 ათასი ლარი დაიხარჯა.