გრიგოლ მიქელაძის სახელობის თოჯინების პროფესიული სახელმწიფო თეატრის ყველა თანამშრომელი გაუგებრად მიიჩნევს, თუ რატომ დადგა მათი ხელმძღვანელის შეცვლის აუცილებლობა. მათი თქმით, ისინი ემხრობიან მოქმედი ხელმძღვანელის დარჩენას. ამ შინაარსის წერილით თეატრის თანამშრომლებმა საქართველოს კულტურისა და ძეგლთა დაცვის სამინისტროს და საქართველოს პარლამენტის განათლების მეცნიერებისა და კულტურის კომიტეტს მიმართეს.

"იმ ფონზე, როცა თეატრების აბსოლუტურ უმრავლესობაში არ იცვლება მოქმედი სამხატვრო ხელმძღვანელი, სრულიად გაუგებარი ხდება რატომ გაჩნდა ეს საჭიროება სწორედ იმ თეატრში, რომელმაც უმოკლეს დროსა და ურთულეს პირობებში რევოლუციური მასშტაბითა და სულისკვეთებით დაძრა ადგილიდან გაყინული სათეატრო პროცესი, გადაახალისა ზოგადი პოლიტიკა, განაახლა რეპერტუარი, ბოლომდე გაიაზრა თავისი სამოქალაქო პასუხისმგებლობა, დაუახლოვდა მაყურებელს", - აღნიშნავენ თანამშრომლები.

მათ იმედი აქვთ, რომ სამხატვრო ხელმძღვანელის არჩევნების პროცესი იქნება ღია, გამჭვირვალე და შედეგები არ გააჩენს კითხვებს რომელიმე მხარისათვის.

"წინააღმდეგ შემთხვევაში, ჩვენ თეატრის თანამშრომლები აუცილებლად გადავდგამთ საპასუხო, ქმედით ნაბიჯს", - ვკითხულობთ წერილში.

საქართველოს ძეგლთა დაცვისა და კულტურის სამინისტროს მედიაკომუნიკაციის სამმართველოს უფროსმა, ლევან ჟორჟოლიანმა On.ge-ს განუცხადა, რომ წერილის შინაარსს არ იცნობს, თუმცა განმარტავს:

"თოჯინების თეატრი გამონაკლისი არ არის რომლის სამხატვრო ხელმძღვანელსაც უფლებამოსილების ვადა სექტემბერში ეწურება. ასეთი სამინისტროს მმართველობის სისტემაში შემავალი 23 თეატრია. კონკურსი 11 ივლისს გამოცხადდა, პირობები კი ღია და გამჭვირვალე იყო. კანდიდატურებს სამინისტროსთან არსებული სარეკომენდაციო საბჭო განიხილავს, რომლებიც თავიანთ რეკომენდაციას მინისტრს წარუდგენენ".