პატიმრობაში მყოფმა საქართველოს მესამე პრეზიდენტმა, ვიდეო ჩართვისას განაცხადა, რომ 2012 წელს მშვიდობიანად გადააბარა ქვეყანა მას, ვისზეც იცოდა, თუ საითკენ წაიყვანდა ქვეყანას.

"ამბობენ: „სააკაშვილის ავტორიტარული რეჟიმი“! - ხალხო, რანაირი ავტორიტარი ვიყავი?! 7 ნოემბერს პოლიციის მოქმედება რომ არ მომეწონა, მიუხედავად იმისა, რომ იმ ყველაფერში რუსი ოლიგარქისა და რუსეთის ხელი ერია, პრეზიდენტობიდან გადავდექი და ვადა შევიმცირე!

ამის მიუხედავად, სხვა რა გამოსავალი იყო, როცა თავად ხალხმა გადაწყვიტა ასე, რუსეთის ჩარევის შედეგად! მე ვარ ავტორიტარი?!

მე საქართველოს გავუხსენი მთელი მსოფლიოსთვის ჰორიზონტები, ქვეყანა ავიყვანე მსოფლიო რუკებზე. შევქმენით სრულიად ახალი განათლების სისტემა, რომელიც სწორედ თავისუფლებაზე დამყნობილ ქართულ გენს ავითარებდა და ავითარებს ჯერ კიდევ, ვიდრე ყველაფერს არ მოხურავენ. ესენი ყველაფერს მოხურავენ, თუ ეს ბრძოლა ბოლომდე არ მივა", — განაცხადა სააკაშვილმა.

ამასთან, მისი აღნიშვნით, გული სიყვარულით ევსება, როცა ხედავს, რომ ყველა დემონსტრანტი, ვინც დღეს აქციაზე დგას, ძალიან კარგად იძლევა ინტერვიუს ინგლისურ ენაზე.

"მეგონა, რომ მე ვიყავი ერთ-ერთი იშვიათი გამონაკლისი და ახლა ყველანი ასეთი ხართ! ყველანი ასეთი განათლებულები ხართ! ყველანი ასეთი თვალანთებულები ხართ და ყველას გესმით თავისუფლების არსი", — თქვა მან.