ეკონომიკისა და მდგრადი განვითარების მინისტრი და ვიცე-პრემიერი დიმიტრი ქუმსიშვილი, პირველ ვიცე-პრემიერად დაინიშნა. დღეს, 13 ივნისს, საქართველოს პრემიერ-მინისტრმა გიორგი კვირიკაშვილმა შესაბამისი განკარგულება გამოსცა.

დღემდე, საქართველოს მინისტრთა კაბინეტში ორი ვიცე-პრემიერის თანამდებობა არსებობს. დიმიტრი ქუმსიშვილი პირველი ვიცე-პრემიერის, ხოლო კახა კალაძე ვიცე-პრემიერის თანამდებობას იკავებს.

დიმიტრი ქუმსიშვილი 1974 წელს დაიბადა. 1989-1991 წლებში კომაროვის თბილისის ფიზიკა–მათემატიკის სკოლა დაამთავრა. 1992-1998 წლებში კი ივანე ჯავახიშვილის სახელობის თბილისის სახელმწიფო უნივერსიტეტის, ეკონომიკის ფაკულტეტზე გააგრძელა სწავლა.

2012 წლის ნოემბრამდე, იგი შპს რეშენალ სოლუშენის სამეთვალყურეო საბჭოს თავმჯდომარე იყო და იმავე პერიოდში, დაწყებითი ბიზნესის და ინოვაციების საინვესტიციო ფონდის დირექტორი.

2012 წლის 30 ოქტომბრიდან, ეკონომიკისა და მდგრადი განვითარების მინისტრის პირველ მოადგილედ დაინიშნა, სადაც 2015 წლის 17 მარტამდე იმუშავა.