3 დეკემბერს რუსთაველის გამზირზე, პარლამენტის შენობასთან დაწყებული აქცია გამთენიისას ვაჟა-ფშაველას გამზირზე დასრულდა. აქციის მონაწილეებმა თბილისის ქუჩებში მსვლელობა მას შემდეგ დაიწყეს, რაც რუსთაველის გამზირზე სპეცრაზმმა მომიტინგეები წყლის ჭავლით დაშალა.

სპეცრაზმმა აქციის დაშლა ღამის 23:00 საათიდან დაიწყო. 23:30 საათისთვის სპეცრაზმმა სრულად გაათავისუფლა რუსთაველის გამზირზე, პარლამენტის შენობის წინა პერიმეტრიც. სამართალდამცავებმა აქციის მონაწილეების მისამართით სპეციალური საშუალებებს, ე.წ. გაზის კაფსულებს ისროდნენ, მომიტინგეები კი მათ წინააღმდეგ — პიროტექნიკას. საპოლიციო ძალებმა აქციის მონაწილეების დასაშლელად რამდენიმეჯერ გამოიყენეს წყლის ჭავლი და გზა და გზა აკავებდნენ აქციის მონაწილეებს. მათ პარლამენტიდან ჯერ რუსთაველის მეტროსთან გადაინაცვლეს, შემდეგ ფილარმონიასთან. მოქალაქეებმა რუსთაველის გამზირის დატოვების შემდეგ, კოსტავას ქუჩაზე ბარიკადები მოაწყვეს. აქცია-მსვლელობა, გმირთა მოედნის გავლით, ვაჟა-ფშაველას გამზირზე დასრულდა.

შსს-ს ჯერ არ გაუვრცელებია ოფიციალური ინფორმაცია, რამდენი ადამიანი დააკავეს 3-4 დეკემბრის ღამის აქციაზე.

მომიტინგეები აცხადებენ, რომ ისინი 4 დეკემბერს, 19:00 საათზე პარლამენტთან კვლავ შეიკრიბებიან.