29 ნოემბერს, საპროტესტო აქციაზე პოლიციელებზე თავდასხმასა და სხვისი ნივთის დაზიანების ბრალდებით დაკავებულ სამ ახალგაზრდას აღკვეთის ღონისძიების სახით პატიმრობა შეეფარდა.

21 წლის ახალგაზრდას, რომელსაც პოლიციელზე თავდასხმას ედავებიან, აღკვეთის ღონისძიების სახით პატიმრობა თბილისის საქალაქო სასამართლოს მოსამართლე ნინო ეპიტაშვილმა შეუფარდა.

ბრალდების მხარე დაკავებულის მიმართ ყველაზე მკაცრი აღკვეთის ღონისძიების, პატიმრობის გამოყენებას ითხოვდა, დაცვის მხარე კი 10 000-ლარიან გირაოს.

მოსამართლემ ბრალდების მხარის შუამდგომლობა დააკმაყოფილა. ბრალდებული დუმილის უფლებით სარგებლობს. ადვოკატი სასამართლოს დღევანდელ გადაწყვეტილებას თბილისის სააპელაციო სასამართლოში გაასაჩივრებს.

რაც შეეხება 17 წლის მოზარდს, მას 29 ნოემბრის საპროტესტო აქციაზე საკანონმდებლო ორგანოს შენობაში ცეცხლმოკიდებული ნივთის სროლას ედავებიან, რის შედეგადაც პარლამენტის შენობის ერთ-ერთ ოთახში ხანძარი გაჩნდა. არსენ კალატოზიშვილმა არასრულწლოვანს აღკვეთის ღონისძიების სახით პატიმრობა შეუფარდა.

კიდევ ერთ დაკავებულსაც, რომელმაც ბრალდების მიხედვით ცეცხლი წაუკიდა პარლამენტის შენობის ფასადზე დამონტაჟებულ 112-ის სამეთვალყურეო სისტემას, მოსამართლე ნანა შამათავამ აღკვეთის ღონისძიების სახით პატიმრობა შეუფარდა.