მაკა ბოჭორიშვილს, საგარეო საქმეთა მინისტრობის პირველ დღეს აზერბაიჯანის მინისტრთან ჰქონდა საუბარი, ხოლო თურქეთის საგარეო საქმეთა მინისტრმა წერილი გამოუგზავნა. ამის შესახებ ინფორმაციას ავრცელებს საგარეო საქმეთა სამინისტრო.

აზერბაიჯანის საგარეო საქმეთა მინისტრმა ბოჭორიშვილს ახალ თანამდებობაზე დანიშვნა მიულოცა და პოზიციაზე წარმატებები უსურვა.

"აზერბაიჯანის საგარეო საქმეთა მინისტრმა ქართველ კოლეგას საქართველოს საგარეო საქმეთა მინისტრის თანამდებობაზე დანიშვნა მიულოცა და ამ პოზიციაზე წარმატებები უსურვა.
ხაზი გაესვა საქართველოსა და აზერბაიჯანს შორის არსებული სტრატეგიული პარტნიორობის მნიშვნელობას, ამასთან, გამოიხატა თანამშრომლობის გაღრმავების მზაობა. ხაზი გაესვა ქვეყნებს შორის მაღალი დონის ვიზიტების გაცვლის დინამიკის შენარჩუნების მნიშვნელობას", — ნათქვამია ინფორმაციაში.

ამასთან, ბოჭორიშვილის საგარეო უწყების ხელმძღვანელის პოზიციაზე დანიშვნა თურქეთის საგარეო საქმეთა მინისტრმაც მოულოცა.

"დარწმუნებული ვარ, ამ თანამდებობაზე თქვენი ყოფნის პერიოდში, ჩვენს ქვეყნებს შორის მჭიდრო ურთიერთობები კიდევ უფრო გაღრმავდება. მჯერა, რომ როგორც სტრატეგიული პარტნიორები, ჩვენ გავაგრძელებთ მშვიდობის, სტაბილურობისა და კეთილდღეობის, ისევე როგორც ეკონომიკური თანამშრომლობის განვითარებას ჩვენს რეგიონში", — აღნიშნულია ჰაქან ფიდანის წერილში.